Sagaing region, Tamu District, Khampat khuaah Military council sipaite leh PDF te, ni 5 chhung an inkahnaah Khampat leh a chhehvel khuaa tualchhung mi 3000 chuang, in leh lo an tlanchhiatsan thu Khampat khuaa tualchhung mi pakhat hnen atanga hriat a ni a.
July 22, zan dar 8 atang khan Khampat No.1 Ward-a Military council sipaite outpost chu PDF-ten darkar khat chhung an beih rawn tawh hnuah July 26 khan an bei chhunzawm zel a.
He inbeihna avang hian Khampat khuaa mi zawng zawng te leh Kanan khuaa mi thenkhat te chu Hmuntha khua, Changelzawl khua, Letpanchuang khua leh Tahan khuaa Veng hrang hrangah an tlanchhiat hlawm thu tualchhung miten an sawi a.
July 26 tuk pawh khan Military council sipaiten Helicopter-in Khampat khua leh a chhehvel chu minute 45 chhung an bomb leh thu hriat a ni a.
“Khampat No.1 Ward, tualchhung PDF camp, Kanan khua No.1 Ward zawng zawng an bomb a, Military council Thlawhna vawi 10 aia tam lo a thlawk kual a, an bomb nasa khawp mai” tiin tualchhung mi pakhat chuan a sawi a ni.
He inbeihnaah hian Military council sipai 13 an thi a, PDF-Tamu lam sipai pakhat a hliam thu hriat a ni a, Khonumthung Media chuan nem nghehna chiah an la nei lo.
July 23 khan Khampat khua, leilet hmuna an inkah tum khan Military council sipai 2 an thi a, he hmuna va en fiahtu PDF ten silai mu an laksak nual thu hriat a ni bawk.
Military council sipaiten ralthuam lian an chelek avangin Khampat No.1 Ward-a RC Biak inah bomb a tlak avangin kum 23 mi mipa a boral thu hriat a ni a. July 26 zan khan Mizo hmeichhe pakhat a chenna ina Military council sipaiten an thah ruang Khampat Mizoten an hmuh thu hriat a ni bawk.
Tun dinhmunah hian Khampat khaw chhehvelah Military council sipaite leh PDF te inkarah boruak a la tang hle thu hriat a ni.
