Military council-in chhuah zalenna a pek zingah Insein jail atanga tang chhuak tur zingah Artists 24 leh mi lar 10 vel an tel dawn thu hriat a ni a, chung zingah chuan zaithiam, lemchan thiam leh model te an tel tur thu Paing Takon-a ukil U Khin Maung Myint chuan a sawi a ni.
Ani chuan, “Kan hriat dan chuan artists 24 leh milar 10, an vaiin mi 34 an tel dawn a. Artist tang zawng zawng deuh thaw chu a ni. October ni 18 tlai lamah a theih ang ang chu chhuah an tum a, an chhungte nen pawh inbe pawpin lo ngah an tum a ni,” tiin a sawi.
Yangon, Insein jail atangin tang engemaw zat chu October ni 18 atanga chhuah zalen an nih dawn thu hriat a ni a, thubuai siamsaka man tawkte chu intiamkamna ziakin an chhuak dawn a ni.
Chu mi chungchangah ukil U Khin Maung Myint chuan, “Thubuai siamsakte chu an thubuaite tihtawpsakin chhuah an ni dawn a. Sipai court lamin an chungthu a rel fel tawh mi 1300 chuang chu an zawm turte bithliahsakin, nakin an tih tawh loh tur thu intiamkamtirin, an tisual leh a nih chuan tuna an thubuai neih lai chu tinung leh a, thubuai inthuah an neih dawn thu pawmna hming ziah hnanin an chhuah a. Jail-a khung tawhte chu chhuah hmasak an ni ang a, ni hnih thum chhungin a tahtawlin an chhuah ang, a hmun hmate pawh an buaisaih vek tawh a, jail lam pawhin a theih zat zat chhuah nghal an tum thu an sawi a ni,” tiin a sawi bawk a.
Sipaiin thuneihna a pawng lak hnuah kawngzawh avanga man tawk mi 1316 leh thubuai siamsak mi 4320 te chu chhuah an tum thu October ni 18 chawhnu lam khan military coucil-in a puang a.
Sipaiin thuneihna a lak hnuah mipui lam ding leh rinawm taka awm milar artists academy chawimawina dawng tawh Lu Min, Pyi Ti Oo, Eindra Kyaw Zin, bakah filmstar Ta Ye Tait, model film-star Paing Takon leh Poe Poe te pawh jail-ah an la awm mek a, an chhuah ve ngei chu mipui lamin an beisei hle a ni.
Hetia tang tam tak vawi khat a chhuah tak vak nachhan hi eng dang ni lovin, ASEAN ram hruaituten military council chu Hetianga tam tak vawi khata chhuah an nihna chhan hi eng dang ni lovin, ASEAN ram hruaituten military council chu ensan a, ASEAN summit-a tel an remtih tak loh avang a tih theih a. Min Aung Hlai chuan a dinhmun ngai luah leh tumin, ASEAN consensus 5 te chu la tihlawhtling thei lo mah se, a hmai phihfai nan tang engemaw zat chu a chhuah zalen ta a ni.
