Mizoram Police chuan July 25-a NGO Coordination Committee-ten kawng an zawhna turah ven himna uluk taka kalpui a nih dawn thu an sawi a.
Tlawmngai pawl hrang hrang intelkhawmte hian, Manipur tualchhung buaina vanga Zo-hnahthlakten harsatna an tawh mek tuarpuina lantirna leh an thlavang hauhna turin Aizawlah kawngzawh an tum a, district khawpui ţhenkhatah pawh kawngzawh tur a ni a.
He kawngzawhna turah hian Mizoram Police te chuan sorkar lam thuneitute nen tha taka thawkhoin an veng uluk dawn niin an sawi a.
Mizo Students’ Union (MSU) hian sorkar hotute nena an inbiak hnuah July 24 atanga Meitei chhiarpui kalpui an tum chu an ţhulh niin an sawi a. Sorkar aţanga thu dawn danin Mizoram a Meitei awm zat hi Manipur a buaina a chhuah hlim khan mi 2,000 chuang hret awm nia hriat a ni a.
Hetihlai hian July 22 khan Meitei 65 chuan Lengpui thlawhna tumhmun atangin Imphal an pan a. He thlawhnaah hian mi 67 an chuang a, 2 chu Mizo an ni a, Silchar lama kal tlang an ni a. July 23 khan Manipur sorkarin Aizawl leh Imphal inkarah Indigo thlawhtheihna 3 a hranpain a ruahman dawn niin phai lam chanchinbute’n an ziak a.
Hemi chungchangah hian Lengpui ţumhmun a official-te chuan Lengpui leh Imphal inkarah hian thlawhna pakhat chauh a thlawh thu leh he thlawhna Alliance Air-ah Meitei 53, an chuan thu an sawi a. Hei bakah hian Indigo Airlines thlawhna, Aizawl leh Kolkata inkarah Meitei 11 an chuang a, Indigo vek Aizawl leh Guwahati inkarah Meitei 14 an chuang bawk a, July 23-a thlawhna hmanga Mizoram chhuahsantu Meitei-te chu mi 78 an ni a. Imphal aţanga Aizawl Alliance Air thlawkah July 24-ah Mizo 31 te an lo haw bawk thu hriat bawk a ni.
