July ni 14, ni khat chhungina ram pum hmun hrang hranga inkahna chhuakah military council sipai 65 an thih thu National Unity Government (NUG)-in thuchhuah an siam a.
Chu thuchhuah siama tarlan thi zat chu a hmuna thi tak tak aia a tlem zawk theih thu leh inkahna hmunah chuan chu aia sipai tam zawk an thih theih thu bakah ni khat chhunga hliam ringawt pawh sipai 16 an awm thu tarlan a ni.
Thuneihna laktu sipaihovin mipuite tharum hmanga rah beh leh tihhlum hna a thawk reng avangin mipui lamin mahni damkhaw chhuah nana lo inven theihna (rights) hmangin mipui defensive war chu beih mek a ni a. June ni 7 atanga July ni 6 thleng, thla khat chhungin military council lamah mi 890 chuang an thi niin NUG chuan thuchhuah a siam a.
Myanmar ram pumah mipuiten sipai thuneihna leh lal hrawtna chu Myanmar leilung ata tihtawp a, Federal democracy tun din theih nan ralmuang taka kawngzawhnate chu state leh region hrang hrangah kalpui mek a ni.
Mipui kawngzawh beihpuithlakna chu July ni 14, ni khat chhungin Mandalay region-ah vawi 2, Sagaing region-ah vawi 9 neih a nih thu thuchhuahah tarlan a ni a.
Chubakah People Defensive war kum khat chhungin military council sipai 15000 chuang an thi tawh a, hliam pawh 4800 an awm tawh thu NUG sorkar hnuaia Defense Ministry department-in thuchhuah a siam a.
Chung thuchhuaha tarlante chu nikum 2021 June ni 1 atanga kumin May ni 17 thlenga record lak khawm atanga puan zar a ni a; mahse Myanmar ram puma inkahnaa sipai thi leh hliamte chanchin kimchang chu military council lamin puanzarna a nei ve lo thung a ni.
NUG sorkar din a nih atanga kum 1 chhungin mipui venghimtu pawl (PDF) battalion 257 din a ni tawh a, township based mipui venghimtu pawl (VDF) te pawh township 25-ah mumal taka din theih a nih bakah, Sagaing region leh Magui region chhunga kawngpui pawimawh tak tak zaa 90 chuangte chu PDF pawl hrang hrangin an thunun tawh thu hriat a ni a.
Chutih rualin PDF te nena inthlunzawm Local PDF te, Urban Guerilla pawl 500 chuang chu awmze nei taka indona hmachhawn ho thei tura inrelbawl vek a nih tawh thu leh chu aia tha zawk Chain of Command nei chho a, hmelhmate nuai chimit a, hneh vek thei tura inpuahchah a ngaih NUG chuan a thuchhuahah a tarlang bawk a ni.
