June ni 7-a ram pum hmun hrang hranga inkahna chhuakah military council sipai 40 an thih thu National Unity Government (NUG)-in thuchhuah an siam.
Chu thuchhuah siama tarlan thi zat chu a hmuna thi tak tak aia a tlem zawk theih thu leh inkahna hmunah chuan chu aia sipai tam zawk an thih theih thu bakah ni khat chhunga hliam ringawt pawh sipai 28 an awm thu tarlan a ni.
Thuneihna laktu sipaihovin mipuite tharum hmanga rah beh leh tihhlum hna a thawk reng avangin mipui lamin mahni damkhaw chhuah nana lo inven theihna (rights) hmangin mipui defensive war chu beih mek a ni a.
Myanmar ram pumah mipuiten sipai thuneihna leh lal hrawtna chu Myanmar leilung ata tihtawp a, Federal democracy tun din theih nan ralmuang taka kawngzawhnate chu state leh region hrang hrangah kalpui mek a ni bawk.
Mipui kawngzawh chu June ni 7, ni khat lekah Mandalay region leh Kachin region-ah vawi khat, Sagaing region-ah vawi 15 kalpui a nih thu thuchhuahah tarlan a ni. May ni 7 atanga June ni 6 inkar, thla 1 lek chhungin sipai 2000 chuang an thih thu hriat a ni bawk a.
Chubakah People Defensive war kum khat chhungin military council sipai 15000 chuang an thi tawh a, hliam pawh 4800 an awm tawh thu NUG sorkar hnuaia Defense Ministry department-in thuchhuah a siam a.
Chung thuchhuaha tarlante chu nikum 2021 June ni 1 atanga kumin May ni 17 thleng, record lak khawm atanga puan zar a ni a; mahse Myanmar ram puma inkahnaa sipai thi leh hliamte chanchin kimchang chu military council lamin puanzarna a nei ve lo thung a ni.
NUG sorkar din a nih atanga kum 1 chhungin mipui venghimtu pawl (PDF) battalion 257 din a ni thei tawh a, township based mipui venghimtu pawl (VDF) te pawh township 25-ah mumal taka din theih a nih, bakah mipui police pawl pawh din a ni tawh a.
Chutih rualin Local PDF te, Urban Guerilla pawl 400 chuang chu awmze nei taka indona hmachhawn ho thei tura inrelbawl vek a nih tawh thu NUG chuan a thuchhuahah a tarlang bawk a ni.
