Sagaing region, Kalay jail-a hren mek Van Dim, Tang Myo Min Thun, hren Win Ko Naing, Maung Nyi, tang Chan Min Ko, hren Tu Khai, Nyuint Win Aung (or) Myo Win Aung te chu chhuah ruk an tum avangin sipaiin an thah vek thu thuchhuah a siam a.

Chu mi chungchangah CNDF military commander chuan an sipaite jail chhungah, hriamhrei tak ngial pawh an neih loh laia kah hlum an tawk chu an phu tawk ang phuba laklet a nih tur thu a sawi.

Ani chuan, “Nimin kama dik lo taka in thah tak kan unaute phuba chu lak a ni dawn a, lo inpuahchah ru. Division 22-a tactical commander leh operation commander te kha zawhna kan zawt duh che u a ni. Hmanni zan khan kan that thei vek che u a. Mipui kan ngaihtuah avangin, in bul thleng rawn kal lovin, in mutui lai pawh kap lovin, mipa leh mipa ralthuam hmangin kan inbei ang tiin kan kirsan che u a. Ralthuam nei lo, jail chhunga awm PDF unaute zawng zawng nimin lamah in that vek a. Chu mi atan a phu tawk in pe ve ang. Lo inbuatsaih rawh u. In sipaite kan manin tha takin chaw te kan eitir a, tun thlengin rawng takin kan tin gai lo. Kan unaute chunga in thiltihah in pek let ve a ngai dawn a, lo inpuahchah ang che u tiin ka sawi a ni,” tiin CNDF sipai commander chuan a puang chhuak a ni.

Kalaymyo Jail-a An kah Hlum Tak Ruangte An Chhung Ten Lak Beisei

March ni 15, tlai lama Sagaing Region, Kalaymyo Jail chhunga Military Council ten Jail tang te an kah hlum tak ruang te chu an chhung ten lak chhuah beiseiin Pastor te an rawih thu hriat a ni.

Military Council mi 50 rual awmna Kalaymyo Jail-ah hian Jail tang thenkhat ten tlan chhuah tumin an hotu mi 3 chema an vau avanga buaina chhuakah Jail tang mi 7 kah hlum an nih thu an thuchhuahah an tar lang.

March ni 16 khan heng an kah hlum tak ruang te hi an chhung ten vui turin an dil thu hriat a ni.

CNDF ten, Jail chhunga an kah hlum tak zingah hian kum 28 mi, Salai Saron Thang Lian (Van Ding) an zing ami a tel thu leh mi dang hliam nasa tak an awm nual thu an sawi.

‘Military Council ten Jail tang te intibuai tiin an thuchhuahah tar lang mah se, a nih kan ring lo. Jail chhungah hian invenna tur ralthuam engmah an nei ve si lo. Politic vanga tang te hi kum khat an tling tawh a, buaina an siam mai kan ring lo’ tiin CNDF thu puangtu chuan a sawi.

Thi te zingah nghawnga in tansak te a awm atang te hian rinhlel loh ngaihna a awm lo tiin a sawi zui bawk.