Chin hnam hrang hrang tam zawk awmna Kalaymyo-ah February ni 1 hnua sipaiin thuneihna a lak, kum 1 chhungin, sipai lam silai hmeh puah vangin civil mi 100 chuang an thih tawh thu Kalaymyo kawngzawh pawlten thuchhuah an siam.
Kalaymyo chu Myanmar ramah sipai thuneihna lak dodaltu hmasa ber zingah a tel a, sipai inawpna dodal avanga nunna hlan pawh kum khat chhungin mi 115 an tling tawh a, chu aia tam zawk pawh an nih theih thu Kalaymyo kawngzawh pawl committee member pakhat chuan hei hian a sawi.
“He chhinchhiahnaa tel lo te pawh an awm a. Theih ang tawka lakkhawm a ni a, list-ah chuan 100 an chuang tawh. Chung zingah kawngzawh avanga kah hlumte an tel a. Sipai indawpna hmuna hruai darkar 24 chhunga thi ta te pawh an tel. Kawng zawh avang chauh ni lovin, kawng hrang hranga military council avanga thi tate pawh chhinchhiah vek a ni a. Mahse, ruang hlawmtu awm lo leh tu tih hriat lohte chu telh a ni lo a, a la kim vek thei lo a ni.”
Chung thi tate zingah kum tling lo naupang 2 an tel a, hmeichhia 10 nen sipai indawpna hmunah an thi a. tualchher bomb avang thi, Tahan inkulhna tihchhiat a nih laia thite, chhan awm lova kah hlum te pawh an tel thu Kalaymyo kawngzawh pawl thuchhuah chuan a tarlang a.
Myanmar ramah sipaiin January ni 1, 2021 atangin thu neihna a la a, January ni 7-ah Kalaymyo mipuite chu kawngpuiah chhuakin dodalna an lantir tan a. March ni 13-ah military council lamin ralmuang taka kawngzawhte chu tharum hmanga a hnawh darh avangin, University zirlai Maung Zin Myo Maung chu silaia kah hlum a ni a. Maung Zin Myo Maung chu Myanmar Spring Revolution-ah Kalaymyo khua atanga nunna chan hmasa ber a ni.
Military council pawlin ralmuang taka kawngzawh Kalymyo mipuite ralthuam hmanga a hnawh darh avangin, March thla tawp lam atangin, Kalaymyo-a sipai thuneihna dodaltu pawl thalaiten Tukuli silai kengin Tahan vengah inphenna kulh siam an bei let a. Kalaymyo chu Myanmar Spring Revolution-ah sipai thuneihna ralthuam hmanga chhang lettu hmasa ber niin, vawiin thleng, chak taka dolettu khua a la ni reng.
