Kalaymyo Chhim lam khua sipaiten an hal chhe zel

0

Kalaymyo chhim lama operation nei mek military council sipaiten khaw hrang hrang an hal a, May ni 20 zinga lam dar 3 vel atangin Le-Chhiaa khua an hal leh thu hriat a ni.

Le-Chhiaa khua chu May ni 16-ah sipaiten an lo hal tawh a, an hal zawh loh chenna in la awm chu tunah an hal nawn leh a.

Kalaymyo chhim lama raltlante tanpuitu pawl zinga pakhat chuan, “Inkahna a awm pawh a ni lo. Anmahni lo bei lettu awm miah lovin, nimin piah zing lamah Kohku khua an hal a, chu mi hnuah Le-Chhiaa an hal leh a, Le-Chhia khua chu tun hmaa an lo hal tawh a nih vangin, hal ral vek an tum a nih hmel,” tiin a sawi.

Le-Chhia khua chu in 200 chuang awmna a ni a, military council sipaiten mei an hal nawn leh avangin, a khaw pum chu meivapah a chang tawh tih hriat a ni a. May ni 17-ah Shia-Taww khuaa, May ni 18-ah Kohku khua an hal tawh bawk a ni.

Kalay chhim lama operation nei mek military council sipaite chu tun hnaiah mipui venghimtu pawl lam nen inkahna nasa tak nei lo mah se, khaw hrang hrang luh chhuahin, chenna in an hal zel a. Tualchhung mite chu a khaw puma tlan chhiain ramhnuai lamah an awm bo vek a.

Kalay chhim lama awm sipaite khaw halte khaw chhak lam Sii, Shiaa-Phu, Trinta, Yi-Shin, Le-chhiaa, Kohku, Shia-Taw khuate telin khaw 10 chuanga chenna in 100 chuang chu military council sipaiten an hal chhe tawh a.

Tunah chuan chung khuaa awm mipui sing 4 chuang chu ramhnuaia raltlanin an awm mek a, damdawi, ei tur leh inzar hulna tur silpaulin te an mamawh hle tih hriat a ni.

Share.

Leave A Reply

Exit mobile version