Kalaymyo chhim lama awm raltlanten silpaulin leh damdawi an mamawh hle

0

Sagaing region, Kalaymyo chhim lama awm raltlante chu May thla chhunga ruah tui a tlak tam avangin, silpaulin leh damdawi lam an mamawhna sang chhovin, a rang lama tanpui an ngaih thu Kalaymyo raltlan tanpuitute hnen atanga hriat a ni a. Raltlan tanpuitu zinga thawk pakhat chuan heti hian a sawi.

“Inkahna a rawn chhuah thut takah chuan an tlan chhiatna lamah an bungrua, an thawmhnaw te an lak theih loh mai bakah tun dinhmunah chuan an in te halsak a ni a, chuvangin silpaulin chu an mamawh ber pakhat a ni. Ramhnuaia an awm tawp avangin, boruak inthlak, ruahtui a rawn tlak takah chuan dam lohna a thleng chho tan a, damdawi leh silpaulin chu an mamawh ber a ni.”

April ni 27 khan khaw chhak lam Sii khuaah military council sipaiten operation an nei a, chu mipui venghimtu pawlin kawng lakah dang chatin an lo kap a, inkahna a nasat avangin a bul hnaia khaw chhak lam Sii khua telin a thenawma awm mipui chu an raltlan deuh vek a ni.

Tun thlengin inkahna avanga raltlan mipuite chu mahni khaw lamah an la kir thei rih lova, Myit-ta-Lui chhak lam kam, ramhnuaiah bawkte khawhin an awm mek a, an hriselna leh ei in tur tanpuina an mamawh hle thu ratllan tanpuitu zinga pakhat chuan heti hian a sawi.

“Lui chhak lam kama raltlan an ni a, thenkhat chu ramhnuaiah khawp kham lo takin an ei a. An khawsak dan pawh a mumal lo hle a, tlang kar leh thing kung hnuaiah pher vel phahin an mu mai a. A dinhmun chu a tha lo hle a ni. Kalaymyo Mipui Tanpuitu pawl lam pawhin theih ang tawk chuan an tanpui a. Mahse chhawmdawlna petu an la tlem hle a. A dinhmun a chhiat em avangin awmze nei taka tanpuina pek a la theih loh a ni.”

Military council sipaite leh mipui venghimtu pawlte an inkah hnu May ni 11-ah military council sipaiten chenna in 900 vel awmna khawchhak lam Sii khaw chhung luhchilhin chenna in te chu a hal chhia a, in 700 vel a kan chhiat vek thu hriat a ni.

Kalaymyo chhim lama inkahna chhuak avangin khaw 20 vela mipuite chu an raltlan mek a, chung raltlanho chu mi 3000 vel an nih thu ratllan tanpuitu pawl atanga hriat a ni.

Share.

Leave A Reply

Exit mobile version