Kalaymyo chhim lam, Gangaw khaw lama Military council sipaite pan mek te CDF-KKG Battalion ten February 6 khan an kap a, Military council sipai officer pakhat a thi a, hliam an awm nual thu CDF-KKG ten hemi ni hian thuchhuah an siam.
Kalaymyo chhim lam, Military council sipaite buk khuarna Yangyi Aung (Yan Chi Awng) camp leh Myauk Si (Hmiuh Si) police station-a Military council sipaite leh Phyusawhti 20 rual te, February 6-a Gangaw khaw lama an pan laiin ChinKin khaw bulah CDF-KKG Battalion te nen an inkah thu hriat a ni.
He inkahnaah hian Gangaw khaw hmar lama awm Phyusawhti pawl leh Military council sipai 100 rual ten Kaba Leidawh atangin ralthuam lian leh tein an kahpui a, CDF-KKG Battalion ten a sir tawnin an kah rawn thu hriat a ni.
An inkah tawnnaah hian CDF-KKG lamah thi leh hliam an awm lova, Military council sipai lamah officer pakhat a thih bakah hliam an awm nual thu CDF-KKG chuan a sawi.
An kah hlum tak Military council sipai officer hi Myuak Si khua police station officer bawk 2, Han Thet tiin tualchhung mi ten an sawi a, nemnghehna chhiah a awm loh thu CDF-KKG ten an sawi bawk.
An inkah hnu hian Military council sipai te, an buk khuarnaah an kir leh thu a hriat a ni.
Kalaymyo chhim lam leh Gangaw township hmar lam motor kawngpui hi ramri-a awm a ni a. Heng kawngpuiah hian Military council sipai ten buk khuarin mipui te raldo dan leh ralthuam hman dan an zirtir thin a, Military council sipaite tirhkah Phyusawhti mi te an tam sawt thu hriat a ni bawk.
