Sagaing region, Kalaymyo hmar lam Tuingo khua leh Minhla (Min Hlah) khaw inkarah April 13, zing dar 11:00 vel khan PDF te leh Military council sipaite an inkah leh thu hriat a ni a.
Military council sipai ten NanSaungPuh khua atangin ni tlakna lam NyuangTaw khua Thlanmual vel an thlen hnuah inkahna a chhuah thu hriat a ni.
PDF tangrual zinga thuneitu mi pakhat chuan “Military council sipaite a rukin an rawn veh kual vel a; kan kap a. Inbeihna tak tak a awm hran lo, a chhehvel awm te an thlaphang hran em em lo” tiin a sawi.
Silai thawm an hriat avangin PyinTawOo, NyaungTaw, Minhla leh AungZua khua mipuite an tlanchhiat nual thu hriat a ni bawk.
March 30 atangin April 5 thleng khan Kalaymyo hmar lam Letpanchaung leh PyinTawOo khaw chhehvelah inbeihna avangin Khaw 17-a tualchhung mipui 50000 chuang an tlanchhia a. April 6 atangin 12 thleng khan boruak a ziawm deuh tiin khawchhung an kir leh hnuah heti hian silai ri an hre leh ta a ni.