Sagaing region, Kalaymyo khawpui atanga hmar lam mel 12 vela hla Pyin Taw U (Tuingo) khuaah March 31 tuk khan Military council sipai ten ralthuam lian an chelek nasa hle thu hriat a ni a.
March 30 khan Kalaymyo township Chan Thar Gyi (Chhian Ta Chi) khua an kah tawh hnua kir leh Military council sipai te Nan Saung Puh khaw hlui an thleng a. He hmun atangin Zo hnathlakte awmna Tuingo khua ralthuam lianin an sai nasat hle thu Tuingo khawchhunga tualchhung mi pakhat hnen atanga hriat a ni.
Military council sipai ten ralthuam liana an kah hian Tuingo thlanmual leh School kianga leilet hmun velah bomb a tlak thu hriat a ni bawk.
Tun hnai lawk atang khan Military council sipai ten Kalaymyo hmar lam zarah operation an nei tan a, March 30 pawh khan Chan Thar Gyi khuaah PDF ho nen an inkap tawh bawk a ni.
Hman ni lawkah pawh khan Tuingo (Pyin Taw U) khaw kiang, Letpanchaung (Let Pan Chhawng) khuaah ralthuam lian a tlak vangin nu pakhat a hliam tawh bawk a ni.
He chanchin ziah lai hian Tuingo khawchhunga mipuite an tlanchhe vek nia hriat a ni a, naupang leh kum upa te kein a khaw chhehvelah an tlanchhia a, Tahan lama tlanchhia te an awm nual thu hriat a ni.
