Sagaing region, Kalaymyo hmar lam zara inkahna avangin tualchhung mipui raltlante ei leh in leh damdawi an mamawh zual hle a, tanpui an ngaih thu hriat a ni.
March thla chawhnu leh April thla chawhma lam khan Kalaymyo hmar lam zara Pyin Taw Oo (Tuingo) khuaah Military council sipaite leh PDF tangtualte an inkap nasa hle a. He inbeihnaah hian Military council sipai ten Thlawhna hmanga an bomb chiam avangin a chhehvel Khaw 10 chuanga tualchhung mipui a sang tel an tlanchhiatna, ni 10 a chuang tawh a.
Heng raltlante hi Kalaymyo leh a chhehvel khaw hrang hranga kohhran leh khawtlang bakah tlawmgai pawl ten an chhawmbawl mek a. Hun a lo rei zel a, raltlan an awm belh zel bawk avangin ei leh inah harsat an tawk zual niin raltlan tanpuitu zinga hruaitu pakhat chuan a sawi.
“A bik takin ei in tur hi a ni ber a, khual thlengtu ten ni tina pek chhuah tur an harsat tawh a. Khawpuia awm te pawh an harsa tan tawh a, Khawtea awm tan phei chuan a tlin tawh meuh lo. Damdawi a tul bawk a, damlo khawsik leh hritlang an awm mek a, inkai chhawn theih a ni bawk sia” tiin a sawi zui bawk a ni.
Sik leh sa inthlak hun lai a, Kalaymyo khawchhung leh a chhehvela raltlan damlo hritlang, kawthalo an tam sawt hle avangin Clinic-ah pawh duhthusamin an enkawl thei tawh loh thu hriat a ni bawk.
“Khawpui chhungah chauh Clinic-a inenkawlna a awm a, Khawte tan phei chuan veivak a harsa hle a, a huhova inenkawlna pawh a awm lo” tiin a sawi zui bawk a ni.
Tun dinhmunah hian Kalaymyo hmar lam zarah raltlan mi 50000 vel an awm nia hriat a ni a. A tam zawk te hi Kohhran hung chhung hmun hrang hrangah an awm deuh ber a, thenkhat chu an chhungkhat laina hnaia khawsa an awm angin Inluaha awm te pawh an awm nual thu hriat a ni bawk.
Kalaymyo hmar lam zarah hian inkah buaina awm tawh lo mah se, Military council sipaite lut leh thei dinhmuna a awm reng avangin tualchhung mipuite an la kir ngam rih loh thu hriat a ni.
