Sagaing region, Kalaymyo hmar lamah Military council sipai ten an beihna avangin khaw 10 chuanga tualchhung mipui 30000 chuang an tlanchhiat thu hriat a ni.
Military council sipai ten Kalaymyo hmar lamah March thla ral atangin an bei tan a. March 31 atang khan PDF te nen Pyin Taw Oo (Tuingo) khaw bulah inbei chhunzawm lehin Military council sipai ten ralthuam lian an chelek nasat hle thu hriat a ni bawk.
He inbeihna avangin Kalaymyo hmar lam khaw 10 chuanga tualchhung mipuite Kalaymyo leh a chhehvelah a khawpumin an tlanchhiat nual thu PDF-a thuneitu pakhat chuan a sawi.
“Military council sipai ten March 30 khan Chian Thar Gyi (Chhian Ta Ji) an pan hlim chuan tlanchhia an la tam lo. March 31-a an inbeihna atang khan a khawpumin an raltlan hlawm a. Thalai thenkhat ten In an nghak a, Tuitheh Kut hnaih tawhah hetia an la bei hi chu an kir a hun tawh khawp mai” tiin PDF thuneitu pakhat chuan a sawi a ni.
Tlanchhia khua te hi Aung Ywa (Awng Zua), Minhla (Min Hlah), Ngyuangkone (Ngiau Kong), Pyin Taw Oo, Myaukchawtaw (Miah Chhaw Taw), Latpanchaung (Let Pan Chhawng), Chin Su, Tayakone (Ta Ya Kong), Nanchuang, Pyitawthar (Pi Taw Ta), Chan Thar Gyi (Chhian Ta Chi) khua te an ni a, heng khua te hi Chin mi Zo hnahthlak khua te an ni.
Heng raltlante hi Kalaymyo chhunga tlawmngai pawl leh kohhran hrang hrang ten an chhawmdawl mek a. Mipa 12600 chuang leh hmeichhia 14500 chuang an vaiin mi 27000 chuang raltlan an awm mek thu Kalay Township People’s Administration ten April 4 khan an record-na atanga hriat a ni.
“Kohhran tangrual pawl ten awmna hmun tur kan lo ruahmansak a. Biak inah te, Bible school hmunah te leh Kohhran building hmun hrang hrangah ei in nen kan enkawl mek” tiin Kalaymyo-a raltlan tanpuitu zinga thuneitu pakhat chuan a sawi.
Heng raltlante hi Kohhran hung chhungah leh an chhungkhat laina hnaiah te an thlen hlawm thu hriat a ni bawk.
Pyin Taw Oo, Tuingo khua atanga Kalaymyo lama raltlan mi pakhat chuan “Kan thlaphangin kan rilru a beihvai khawp mai. Eng nge kan thiar chhuah dawn pawh kan hre lo, kan rilru a hamhaih vek a, chhung te hnenah kan la awm rih a, rei tak kan awm kan ring lo, kan lo awm rei a nih pawhin Kohhran hung chhung, min thlentirna hmunah kan awm rih ka ring, a theih chuan kir leh thuai kan duh” tiin a sawi a ni.
Military council sipai ten April 3 khan Tuingo khuaah Jet Fighter leh Mi35 Helicopter hmangin an bomb chiam a, Kalaymyo atang pawhin Laipuiin an bomb ngun hle avangin PDF te an insaseng thu hriat a ni bawk.
Military council sipai ten Tuingo khawchhungah buk an khuar tawh avangin inbeihna boruak a sosang mai thei a ni.
