Sagaing region, Kalaymyo chhungah Military council sipaite kawng hrang hranga an chet nasat thu tualchhung mi pakhat chuan a sawi a.
June 15 zan dar 9:10 velah pawh khan Kalaymyo chhim lamah Military council sipaiten ralthuam lian an kah nasat thu hriat a ni a.
“June 15, zan dar 9:10 vel khan Kalaymyo chhim lamah ralthuam lian vawi 6,7 vel an kah chhuah thu hriat a ni a, chenna in chhiat zat leh thi leh hliam zat hriat chian a ni lo” tiin Kalaymyo-a tualchhung mi pakhat chuan a sawi a.
Tun hnai lawk atang khan Military council sipaiten tun hma aiin khawchhungah ralthuam lian an chelek nasat avangin mipuiten an hlauh thu hriat a ni a.
“Tunlai hian chhim lamah Military council sipaite an hrang zual a, Bike-a inphur mi 2 te pawh eng mah zawt lovin an man ringawt a. Mipa leh hmeichhia pawh Bike License nei lo te chu Kyats 30000-60000 an chawitir thin” tiin Kalaymyo-a tualchhunga mi pakhat chuan a sawi a.
Heng bakah hian Military council sipaiten Tahan Kalaymyo, NiChia Taih kawta bunker an thiat a, Tahan traffic point chhehvelah thir hling neiin kawng an dan nual thu hriat a ni bawk.
June 16, zing dar 11 atangin chhun dar 12 thleng pawh khan Kalaymyo chhim lamah ralthuam lian vawi 9 zet an kah chhuah thu hriat a ni bawk.
