Sagaing region, Kalaymyo township chhim lam PaukKaung khaw bulah May 27 tuk khan Military council sipaite an operation laiin zing dar 8 velah PDF tangrual pawlten bomb kam hmangin an beihnaah Military council sipai 20 chuang an thih thu tualchhung mi te leh Revilution pawlten an sawi thu hriat a ni a.
Kalaymyo khawpui atanga feh chhuak Military council sipaite chu Kalaymyo khawpui duangtu UG pawlte leh NUG-PDF tangrual pawlten an ruahman lawkna angin bomb kam hmanga an beih rawn thu hriat a ni a.
“Bomb kamna hmunah thi leh hliam an awm nual a, bomb puah hnuah an tlanchhe nual a, an ruang te pawh an thliar nual” tiin Revolution pawla thuneitu pakhat chuan a sawi a.
Bomb kam hmanga an beihnaa Military council sipai thi te ruang, an thianten an thliar lai Vedio pawh Revolution-ten an post thu tar lan a ni a.
Bomb kam hmanga an beihnaah hian Military council sipai 28 an thih thu Revolution pawlten an sawi a, nemnghehna chiah a la awm rih lo a ni.
He inbeihnaah hian Military council hnen ata silai mu bawm 3, silai mu tlawn 60, silai mu ip leh phone 3 bakah hmaraw tam tak Kalaymyo khawpui duangtu pawl UG leh NUG-PDF pawlten an laksak thu hriat a ni bawk.
Tun hnai lawk atang khan Military council sipaiten Kalaymyo township chhim lamah ralthuam lian an chelek nasat avangin tualchhung mi pakhat a boral a, mi 10 chuang an hliam thu tualchhung mi te hnen atanga hriat a ni a.
May 27 khan Military council sipaiten ralthuam lian an kah chhuah avangin Kalaymyo chhim lam, TaYaWaDi khuaah nutling pakhat a boral a, mi 7 an hliam thu hriat a ni a. May 26 pawh khan Military council sipaiten ralthuam lian an kah avangin TaSi khuaa chenna In thenkhat a chhiat angin May 25-ah pawh ThaohKyant khuaah tualchhung mi 3 an hliam thu hriat a ni bawk.
