Sagaing region, Kalaymyo khawpuiah Military council sipai ten March 23 khan private motor 100 chuang an hman luihsak a, Military council sipai te ralthuam leh ei in phurh nana an hman leh thu CDF te leh thuneitu pakhat chuan a sawi a.
“Chanchin kan hriat dan chuan Military council sipai hmunpui Dah Kah Sah-ah motor 100 chuang a awm a, motor dang erawh kan hre chiang lo. March 23 zan khan Kalaywa khaw lamah motor ke 6 nei, 4 lai a chhukthla a. Hetia motor an hman luihsakna chhan hi Military council sipai ration phurna atan an hmang niin kan hria a, a hnu leh zelah pawh private motor an hman luihsak thu kan hre nual” tiin CDF leh thuneitu te chuan an sawi a ni.
Heng an motor hman luihsak te hi sum paia tlawn te an chhuak leh theih thung thu hriat a ni.
“An motor hman luihsak hi an tam khawp mai. Sum paia tlawn te chu an chhuah zalen thung a, suma tlawn thei lo te chu an man zui a, Bike ke 3 nei thlengin an zuah lo. An motor hman luihsak te hi an awmna chin a hriat theih tawh lova, an biak pawh theih loh” tiin a sawi zui bawk.
Suma an tlawnna chungchangah Khonumthung Media chuan nemnghehna an la nei rih lo a ni.
Military council sipai ten March 9 khan private motor hman luihsakin armoured car telin Track motor 30 chuangin ralthuam leh ration phurin Chin Hill, Falam leh Halkha-ah an chhoh laiin CDF ten kawng lakah an lambun thu hriat a ni.
