Sagaing region, Kalaymyo-ah Rukruk leh inrawkna a hluar chho zel a, in bula dah bike, phone te chu ualau taka an ruk thin thu tualchhung mite hnen atanga hriat a ni.
August ni 17-ah Tedim township, khaw pakhat atanga Kalaymyo, Hmunlai venga bazar tura lo kal zawk pakhat chuan in kawtah a biake chu chhun laiah tleirawl pahnihin an ruk bot hu tualchhung mi pakhatin a sawi.
Kalaymyo veng tam takah a huho emaw, pahnih thum emawa thil ruk, tualchher silai hmanga mi suamna emaw a thleng bakah, ina tui in tur anga in sawi, in chhunga a rem rem thil lak chingte pawh an awm a.
Tun hnaiah pawh tute tih hriat loh mi pahnihin Kalaymyo, Tangphila veng-a in pakhatah lutin an vau a, pawisa leh rangkachak thi pakhat an laksak a, kar khat vel liam taah pawh, hmeichhe pahnihin Kalaymyo, Tahan venga in pakhatah kan tui a hal a, kan tui um hi kan lo dah khat lawk tia dilin, an lut a, in neitu awm lai ngeiin phone pahnih charge lai chu ru-in an tlan chhuah thu hriat a ni.
May leh June thlaah pawh Tahan veng, zan lai mi tam zawk mut tui laiin, gate tichhiain huan chhunga bike an ruk chhuak nual a.
Chutianga rukrukna a hluar chho nachhan chu sipaiin thuneihna an pawng lak avanga ram chhung dinhmun mumal lo, sumdawnna tlakchhiatna te, hna thawh tur vang leh lak luh tlem laia thil man a san chho nasa lutuk vang a nih theih thu tualchhung miten an sawi bawk a.
Kawng leh lamah chuan thuneihna latu leh sipai hotu ber Sr. Gen. Min Aung Hlai chuan kum 2021 February thla leh April thlaah Ngainatthiamna hmangin tang 40000 chuang vawi 2 a chhuah zalen tawh a, chung tang chhuak tam zawk chu ruihtheih thil vang leh rukruk avanga tangte an ni a, ram pumah chungtiang sual rawngbawl thinte an awm tak vang niin an ngai bawk a ni.
