Sagaing region, Kalaymyo, Taungphila Ward, No.14 Hight school bulah bomb a tlak avangin nu pakhat a boral bakah zirlai naupang pakhat a hliam thu hriat a ni a.
July 11 zing dar 6 atang khan Kalaymyo-ah bomb ri, hriat tur a awm tan a, zing dar 8 vel khan Taungphila Ward No.14 school bulah bomb vawi 2 a tlak avangin tualchhung mi an hliam bakah school kal tur te an haw leh thu zirlai pakhat chuan a sawi a.
“Kan school bulah bomb a puak a, zirlai pakhat a hliam a, nutling pakhat hliam phei chu thisen a chhuak nasa khawp mai, Bike-in damdawi in an panpui nghal a, kan zirtirtuten min hawtir hlawm” tiin a sawi a.
Ralthuam hliam nutling pakhat chu damdawi ina an panpui lai mekin kawng lakah a boral thu hriat a ni bawk.
A hun lai dinhmunah hian bomb puak ri hriat tur a awm reng a, Hmunlai Ward, Boyoke (Bu Chhoh) main road-ah pawh Military council sipai te leh police-ten kawnga kal apiang an check uluk hle thu hriat a ni a.
Military council sipai Battalion 228-ten ralthuam lian an kah chhuah avangin ChuTungPin (Thing Unau) Ward-ah pawh bomb a tlak thu hriat a ni bawk.
