Sagaign region, Kalaymyo, Tahan vengah June ni 12 zana military council sipaiten laipui vawi 10 aia tam an tawng pawng kah avangin, mi 7 vel an hliam thu leh chenna in 4 a chhiat thu hriat a ni.
Tahan veng awm pakhat chuan, “Laipui vawi 12 vel a puak a, hliam zat hriat theih chinah mi 7 an awm a, mi 10 vel pawh an ni thei. Kan in kawt lawkah pawh an hliam, mahse ngaihtuahawm a ni lo, kut ke tan a ngai lo hlauh a, kan la vannei zawk a ni,” tiin a sawi.
Tahan A group-ah ringawt pawh bomb 7 vel a puak a, in 4 vel a chhiat thu hriat a ni.
Kalaymyo thlang lam vengah June ni 12 zan tir lama bomb puak ri hriat anih hnu, zan dar 8 velah Tahan venga chenna in pakhat chu laipuiin a deng chhia niin tualchhung mi pakhatin DVD a hrilh.
Tahan venga awm tho pakhat chuan chuan, “Laipuiin zan lamah in chu a deng fuh a, zan thimhlim atangin laipui puak ri hriat a ni a. Tun hma pawhin Minkin lama raltlante laipui avangin an lo thi tawh a. Mahni inah himin kan inhre tawh lo a ni,” tiin DVB a hrilh bawk a.
May ni 10 leh ni 25 zanah pawh Taungphila lam atanga sipai laipui kah puahin Tahan veng chhunga chenna in pakhat fuhin hliam an thu hriat a ni a, May ni 29-ah pawh laipui kah puahin Tahan veng Wesley damdawi hnunga awm hmeichhe pahnih leh mipa pakhat a lo deng hlum tawh bawk a.
April ni 29 zanah pawh Tahan veng, rel station leh Emmanuel biak in bulah bomb puakin tualchhung mi pakhat a thih thu hriat a ni a. Chuvangin, Tahan veng chhunga awmte chu zan tin thin thia an mut theih loh thu hriat a ni.
