Sagaing Region, Kalaymyo township atanga Tamu khawpui pan mek Military Council sipaite chu Land-mine hmanga beih an ni a. Military Council sipai Motor pakhat kawngah a liam thla a, pakhat dang erawh a chhe hneh hle tiin Kalay PDF ten an sawi.
August 30, zing dar 6:00 velah Military Council sipaite chu Kantaya (Kan Ta Ya) khua atanga Tamu khawpui an pan mek laiin Kanhla (Kan Hlah) khaw chhim lam Teak phunna kiang lawkah beih an tawk a.
Kalay PDF-a thuneitu pakhat chuan “ Keini PDF Battalion te leh Khawchhung mipui veng himtu pawl ten kan lo chang ran a, kan ti puak a. Motor pakhat kawngah a liam thla a, pakhat zawk pawh a chhe nasa hle” tiin a sawi.
Kawnga operation an neihnaah hian Military Council sipaite chauh ni lovin Phyusawhti te pawh an tel nia hriat a ni. Bomb kam hmanga beihnaah hian thi leh hliam hriat chian a ni lova, PDF tangrual pawl lam erawh thi leh hliam an awm loh thu an sawi.
August 29, zan dar 7:30 vel pawh khan Kalaymyo township chhim lam, Mraukzi (Miauh Si) Police Station atanga hmar lama pan mek Military Council sipai 20 rual te chu PDF-Kalay ten Bomb kam hmangin tum 2 an lo bei a. Military Council sipai 2 an thi a, mi 4 an hliam nasat thu PDF-Kalay ten an thuchhuahah an tar lang.
Tun dinhmunah hian Kalaymyo township huam chhungah Military Council sipaite leh PDF te an la inkah reng avangin mipuite zin veivak te fimkhur a tul thu Kalay PDF ten mipuite a hriattir.
