July 11 atanga July 13 thleng khan Sagaing Region, Kalaymyo township chhim lamah Military Council te leh PDF te an inkap nasa hle a. Military Council lam mi 42 an thi a, PDF lam mi 2 an boral thu PDF-Kalay ten an thuchhuahah an tar lang.
July 11 atang khan Kalay PDF insuikhawm pawl, PDF Kalay, Vakok CNDF, CDF KKG, RKDF, UGF Kalay, Pawl dang te leh Military Council te, an inkahchilh nasa hle tih hriat a ni.
July 12, tlai lam dar 4:55 atang khan Military Council te thawk chhuak mek chu Tasi khua, Thilashin Yeihta (Tih Lah Sin, Zeih Ta) School an thlen rualin PDF tangrual pawl te nen inhmachhawnin an inkap nasa hle a, Military Council lam thi leh hliam an awm nual thu hriat a ni.
July 13, zing dar 7:30 atang khan Tauk Kyan (Thauh Chianh) khaw chheh velah Military Council te leh PDF tangrual te, inhmachhawn lehin an inkap leh nasa hle a. Land-mine, ralthuam lian leh te hmangin an bei hrep a, Military Council lam ni 42 an thi a, PDF tangrual lam mi 2 an thih thu hriat a ni. A inbeih hun chhung hi a rei thawkhat hle a, tlai lam dar 2:15 thleng an inkah hnuin PDF tangrual ten an hnungtawlhsan rih thu hriat a ni.
