July 16 tuk khan, Sagaing Region, Kalaymyo township, Tahan khawpuiah Rev.Dr. Dal Khan Mang leh a chhungkua mi 3 te chu Military Council ten an man thu hriat a ni.
July 16, Inrinni, tuk, zing dar 7:00 vel khan Pastor leh a nupui, Bazar-a kal tur chu Tahan, Bogyoke (Bu Chhoh) kawngpui, AG Biak in kawta, Military Council te kawnga kal, an check laiin an check ve a. Pastor Phone-ah ram buai thlalak an hmuh anga sawiin an man a.
Hemi hnu hian Military Council ten Pastor te nupa, an chenna ina an hruai hnuin Pastor leh a nupui bakah an fa 2 tiamin an man thu, an laina hnai hmeichhe pakhat hnen atanga hriat a ni.
An man tak, chhungte mi pakhat chuan “ An man hlim hian Miliatry Comman hmunpui (Dah Kah Sah)-ah an hruai a, a hnuah Police Station-ah zan an riahtir a. An biak pawh thei lova, an hmelhriat ten chaw an pe a, vawiinah an chhuah ang an tih avangin an chenna inah kan nghak mek a ni” tiin a sawi.
July 18, zanah chuan an man tak Pastor-te chenna inah Kohhrah upa leh thalai rual bakah an laina hnai ten Pastor-te chhungkua hawng tur chu an nghak nual a. Tlai lam dar 3:30 hnuah Pastor-te chhungkhua te an haw thu, a sawi zui bawk.
Rev.Dr. Dal Khan Mang hi Tahan, Mercy Baptist Kohhrana Bialtu Pastor a ni mek.
Tunhnai lawk atang khan Military Council ten Kalaymyo khawchhung hmun hrang hrangah a Duty nasa hle a, Mipui veivak te, Bike leh Phone an Check-sak nual thu hriat a ni a.
July 16 pawh khan Kalaymyo ni tlakna lam, Du Wain Chaung (Varpui) khuaah in saknaa, Payan (Brick rem te) mi 8 te, Military Council ten an man a, an la chhuah rih loh thu hriat a ni.
