Sagaing region, Kalaymyo township chhim lam Kalaymyo leh Gangaw motor kawngpuia awm Hmantaw khuaah February 8 khan Military council ten nupa an hal hlum bakah an chenna in an hal chhiat thu hriat a ni.
An hal hlum tak nupa te hi kum 52 mi Pu Hram Mang leh kum 32 mi a nupui Pi Mu Ka Hlia te an ni a. February 8, zan dar 10:00 vel khan Military council sipai ten an chenna inah luhchilhin an kap hlum ringawt tiin a hnaivai mi ten an sawi thu hriat a ni.
Military council sipai ten Pu Hram Mang te nupa an hnungkhirha an kah hlum hnuah an chenna in an hal thu hriat a ni.
Pu Hram Mang puzawn Pu Maung Cho chuan “Ramhnuaia kan awmna atangin kan hria a, kan fanu te nupa an thah bakah an In an hal bawk. Ka fanu an thah chungchangah ka lungawi lo hle a, a ruang hmu tur pawhin an phum tawh bawk sia” tiin a sawi.
Kalaymyo township Hmantaw khuaah PDF te leh Military council te inkah tawhnaah tualchhunng mi te, a khaw chhehvelah leh Kalaymyo khaw chhehvel khuaaah an tlanchhiatna hi kum khat a chuan tawh thu hriat a ni.
A hal hlum tak Pu Hram Mang te nupa hian fa 2 an kalsan thu hriat a ni.
February 10, zan dar 6:00-ah pawh khan Kalaymyo khua, Taung Za Lat Ward-ah Military council sipai ten an kahna avangin Lautu Baptish kohhran Rev. Ram Hlun fapa Salai Bawi Lawm Thang (Bi Bi) a boral thu hriat a ni.
