Sagaing region, Kalaymyo township Pyin Taw U (Tuingo) khaw kiangah March 31 tuk atang khan Military council sipaite leh PDF te an inkah avangin tualchhung mipuite a khawpumin an tlanchhiat deuh vek thu hriat a ni.
March 31 zing dar 8:00 vel atang khan Military council sipai ten ralthuam lian an kap nasa hle a. Nan Saung Puh khua leh Tuingo khaw inkarah Military council sipaite leh CDF, CDM Siyin, KRF, KKG, CNDF tangrual pawl te nen an inkap a ni.
Tuingo khawchhunga mi pakhat chuan “Nan Saung Puh khua leh kan awmna khua Thlanmual velah an la inbeih reng avangin tualchhung mi te an tlanchhe vek deuhthaw a. A khaw chhehvel leh ramhnuaiah an tlanchhe hlawm a, an dinhmun an harsa hle a. Keini chhungkhua pawh Bike-in kan tlanchhuak” tiin a sawi a ni.
Military council sipai ten hman ni lawk atang khan Kalaymyo hmar lamah an che tan a. March 30 khan Chan Thar Gyi (Chhian Ta Chi) khuaah Military council sipaite leh PDF te an inbeih tawh hnua kir leh Military council sipai ten Nan Saung Puh khua atangin Tuingo khua an luh leh hnuah PDF te nen an inkap a ni.
Military council sipai ten ralthuam lian an kah chhuah ngun avangin khawchhungah bomb a tla nual a, Tuingo khuaa tualchhung mi pakhat a lu a hliam thu hriat a ni bawk.
Military council sipai ten hetia ralthuam lian an chelek chiam avangin Tuingo khua bakah Latpanchaung, Myauh Chhaw Taw, Chan Thar Gyi khuaa tualchhung mipuite Tahan leh a khaw chhehvel ramhnuaiah an tlanchhiat nual thu hriat a ni a.
Pyin Taw U, Tuingo khua hi Chin Zo hnahthlakte awmna khua a ni a, Kalaymyo khua atangin mel 12 vela hla a ni a, In 800 nufa chenna khua a nih thu hriat a ni bawk.
