Sagaing region Kanbalu township hmar lam mel 30 34 vela hla Paukkone khuaah chenna in leh a kaihhnawih 100 chuang, hal chhiat a nih thu Military council sipai ten April 1 khan an thuchhuahah an tarlang.
March 30 zan 10:00 vel khan mipui veng himtu pawl PDF ten chenna in 70 leh Bawng in 31 an halchhia tiin an tarlang a.
Kanbalu township-a mipui veng himtu pawl PDF te chuan March 30 hian Paukkone khua leh a chhehvelah inkah buaina eng mah a awm lova, chenna in hal pawh eng mah a awm lo tiin an sawi ve thung a ni.
Kanbalu khawpuia tualchhung mi pakhat chuan Paukkone khaw bulah Military council sipai ten operation an neih thu a sawi a.
“Paukkone khua an hal lo. An tih pangngai angin tunah pawh buk an la khuar reng a ni” Kawlin khua atang feh chhuak Military council sipai 80 rual te Paukkone khuaah buk an la khuar reng tiin a sawi zui bawk a ni.
Military council sipai te chuan PDF ten tualchhung mi 9 an hliam a, thi an awm nual tiin an tarlang a. Thi zat leh hliam zat kimchang an tarlang lova, eng vanga thi leh hliam an nih leh kum zat te pawh an tarlang lo a ni.
April 2 zing dar 6:00 vel khan Kanbalu township Ngia Inn khua Military council sipai ten luhchilhin chenna in an hal thu Kyunhla (Chun Hlah) Kanbalu active pawl Kanbalu district chuan April 2 khan an thuchhuahah an tarlang a ni. Heng bakah hian Shawphyukone (Shaw Phiu Kong) khuaah Military council sipai Kah Lah Yah (IB) 137, sipai 50 rual ten April 2 khan an luhchilh hnuah chenna in an hal nual thu Kyunhla (Chun Hlah) Kanbalu active pawl ten an sawi bawk a ni
