Chin State, Kanpalet khawpuia operation nei mek Military council sipaite leh CDF tangrual pawlte chu Kanpalet chuanhnuai MyaitNuTu kawng kawi bulah an inkap nasa hle a, Military council sipai 5 an thi a, CDF tangrual pawl zinga sipai 4 an hliam thu hriat a ni a.
Saw township atanga Military council sipai 170 te chu pawl 2-a inthenin Kanpalet township-a operation an neihnaah CDF tangrual pawl te nen July 19 tlai dar 6 vel atang khan an inkah nasat thu CDF-Kanpalet-a thuneitu pakhat chuan heti hian a sawi a.
“Kan chenna hmun a zau vak lova, mihring cheng tlem mah ila, theihtawpin kan bei dawn a. Hetia kan beihna turah hian kan sipaite, tan lak lehzual nan ralthuam leh ration kan mamawh tak zet a ni” tiin CDF-Kanlapet thuneitu chuan a sawi a ni.
Magway region, LaungShi atanga Kanpalet township, CinDwe (Chin Dui) khuaah Military council sipai 300-ten Trank 2, JCV motor pakhat leh sipai motor 20-a kal te chu CDF tangrual pawlten an beih rawnnaah Military council sipai 20 chuang an thi a, hliam an awm nual thu hriat a ni bawk a.
He inbeihnaah hian CDF tangrual sipaite hliam an awm nual a. CDF Kanpalet te hian, an duh anga ralthuam hman tur an neih loh vang leh petrol hman tur pawh an bat thin thu CDF-Kanpalet, Khonu battalion-ten an thuchhuahah an tar lang a ni.
He inbeihna avangin Chin-Magway ramri-a tualchhung mi 3000 chuang an raltlan tawh a, heng zinga mi 2000 vel te chu Kanpalet khawpuiah an awm darh hlawm a, raltlan thenkhat te chu damloin damdawi an mamawh thu leh ei in bakah awm hulna tur In chung khuhna an mamawh zual thu hriat a ni bawk.
