Kanpalet khawpuiah emergency-a hman atan mipui sum thawhin motor kawng an lai

0

Chin State, Kanpalet township-a mipui ten an ei in thliar luh nan leh hriselna atan mipui sum thawh khawmin motor kawng mel 3 vela thui an lai zo tawh a, Janaury 28  khan an hawn thu hriat a ni.

Heng bakah hian mel 7 chuang vel laih leh an hmabak thu hriat a ni bawk.

Kanpalet khawpuia tualchhung mi pakhat chuan hetia motor kawng an laih chungchangah heti hian a sawi.

“Kyin Due (Chin Dui) khuaah motor kawngpui an khar rih avangin a kal pawh thei lova. Kawng thar an sahna chhan hi khaw 80 chuanga mipui 6000 chuang ten ei in thliar luh nan leh hriselna atan tiin theih tawp an chhuah a. Mi mal leh chhungkhaw tlawmngai ten an thawh nual a, thenkhat chu a bain an thawk a; chuvangin ram pawna awm Kanpalet mi leh sa ten theih tawp chhuaha sum leh pai thawh hram turin kan beisei” tiin a sawi zui bawk.

Tuna motor kawng mel 3 zeta thui an laihnaah hian Kyats nuai 600 chuang sen a ni tawh a. An hmabak mel 7 zeta thui, lai leh tur hian Kyats nuai 1000 chuang mamawh tura beisei a nih avangin tlawmngaia sum thawh tur te tan Kanpalet township public administration te hnenah a dawr thei reng a ni.

Share.

Leave A Reply

Exit mobile version