Sagaing region, Kawlin township, Khinta circuit huam chhunga khawlal pakhat telin civil mi 9, Military council sipaiten an man hnuah a huhova an thah thu Kawlin Revolution-KR-te hnen atanga hriat a ni a.
May 28 khan Kawlin township, SaPiKyaukTan khaw bul, ThitPhuHla tlanga Military council sipaite operation mek te chu Kawlin battalion 1, Kawlin township PDF-ten an beih rawn a. Military council sipaiten tualchhung mi 16 an man zinga mi 5 an chhuah leh a, mi 8 an that hnuah mi 5 chin hriat lohin an awm thu hriat a ni a.
Heng bakah hian PhetKhaKone khuaah an khaw upa an that leh a, an vai hian Military council sipaiten tualchhung mi 9 an that a, chin hriat loh mi 4-te an zawn mek thu Kawlin Revolution-KR-ten an thuchhuahah an tar lang a ni.
Military council sipai 70 rual, Khah Lah Yah (IB) 369-te hian May 27 khan Kawlin khua atangin an feh chhuak a, PDF battalion 1, huam chhung KyaukPaThu khuaah chenna in an thiat nual a. June 2-a KoThongBo khua atanga lo thleng Khah Mah Yah (IB) 363, sipai 53-te chu ThitPhuHla PhayaKone hmunah infinin a hmasaa nasain operation an neih thu hriat a ni bawk.
June 4 pawh khan OngPinKone khua atanga feh chhuak Military council sipaite chu Kawlin District Battalion 1-ten an beih nawn leh a. He inbeihnaah hian Military council sipai 2 an thi a, mi 13 an hliam bakah ralthuam hmanrua tam tak an laksak nual thu Kawlin PDF-ten an thuchhuahah an tar lang a ni.
