Thai leh Myanmar ramri-a awm Daw Nakoo Karenni Refugee Camp-a awm te hi Thai atangin ei in leh bungrua a thawn lutna hmun pakhat a ni a. Chawlhkar liam ta atang khan Thai atangin Myanmar lam panna kawng an khar tak avangin raltlan camp-ah ei in leh thil dang phurh luh a ni ta lova.
Ramri-ah Kayin Ni leh Military council sipaite an inkah thin avangin Thai lamah ralthuam lian a thla thin a, chuvangin Thai chuan security an dah uluk hle tiin a sawi a.
Kum 2023 January atang khan Thai chuan ramri-ah security a dah belh bakah duty an uluk sawt hlena chhan chu inkahna buaina vang a ni a.
Kayin Ni Battalion KA thupuangtu chuan kum 2023 kum tir atangin March chawhnu thlengin inkahna vawi 14 a chhuak tawh tiin a sawi a ni.
He inkahna hi Military council ten township 37-a Martial Law a puan hnua thil thleng a ni a. He inbeihnaa thil langsar tak pakhat chu February 27 khan tlang chunga 1441, KA ten an laksak a. March 6-ah Military council sipai We Aw camp leh March 16-ah We Hai camp te KA ten an laksak bawk a ni.
March 19,20 khan Military council sipai ten an camp laksak lak leh tumin Pan Yon hmuna an beih thu KNPP General secretary 2, U Aung San chuan heti hian a sawi.
“Pan Yon hi Shan leh Kayin Ni ramri a ni a. Chu hmunah chuan kan camp a awm a, vawi 3 mi beih hnuah an kir leh a. An ralthuam lian kah Thai lamah 7 a tla a, chu chu an sawi ngam lova, kan inpawhna kawng an khar ringawt” tiin a sawi a ni.
Daw Nakoo Karenni Refugee Camp-a awm mi 2500 chuang ten ei in leh thil hrang hrang an lak luhna Thai ramri kawng ber an khar avangin harsatna an tawk nasa hle a. KA leh Military council sipaite inkahnaah Military council sipai thi leh hliam an awm nual a. Thai lamah ralthuam lian a tlak thu Kayin Ni human right pawla Ko Ba Ngian chuan a sawi.
He inkahna hmun hi Thai leh Myanmar ramri a ni a. Shan leh Kayah State ramri Thai lamah khaw pakhat chauh tih loh chu Tlang hmun vek a nih avangin ralthuam lian tla mah se, In chhia leh mihring hliam a hlauhawm loh thu Ko Ba Ngian chuan a sawi bawk a ni.
Hetianga Kayin Ni raltlan camp-a awm te kawng hrang hranga an mangan tawhnaah Kayah State Military council thupuangtu Immigration Minister U Aung Win Oo an phone-naah chhanna a awm rih lo a ni.
