Kachin Baptist Convention (KBC) President hlui Rev. Dr. Hkalam Samson, Military council ten thubuai 3 awrhtirin April 7 khan kum 6 Jail tang turin an hrem thu a Ukil chuan BBC Media a hrilh a.
Rev. Dr. Hkalam Samson hi Military council ten dan lova pawl dang pawhna (Section of the Unlawful Communications Act) Act section 17/1, section 505 leh section 52(A) hmangin thubuai an awrhtir a, thla 4 a nih hnuah hetiangin an hrem ta a ni.
Rev. Dr. Hkalam Samson hi a hriselna a that loh avangin kum 2022 December thla khan Thai-a in enkawl tura a kal tur Mandalay Airport-ah an man a, he case hmangin Myitkyina (Mit Chi Na) lung inah an khung a.
“Section 17(A) case-in kum 2, section 505(A) case-in kum 1, ram tibuaitu section 52(A) case-in kum 3, a vaiin kum 6 Jail tang turin an hrem a. A tul dan a zirin appeal turin hma kan la ang” tiin Rev. Dr. Hkalam Samson Ukil chuan a sawi.
Court-a inlan turin Rev. Dr. Hkalam Samson hi a hriselna a la pangngai thu a sawi zui bawk.
Rev. Dr. Hkalam Samson, chhuah zalen a nih theih nan khawvel ram hrang hrang leh human right pawl ten an ngen laiin heti hian kum 6 tang turin an hrem ta a ni. Military council te case-ah hian KIA control area Laiza hmuna an hruaitute nen an inhmuh thu te a tel thu hriat a ni.
