Sagaing region, Tamu township, Khampat khuaa police station leh Military council sipai camp chu PDF-ten an beih avangin Military council sipaiten mipui awmna hmunah ralthuam lianin an kap a, tualchhung mi pakhat a boral thu tualchhung miten Yangon Khit Thit Media an hrilh a.
July 22, zan dar 8 vel khan PDF sipai 2, Military council sipaiten an man chungchangah Khampat-a police station leh Military council sipai camp chu PDF-ten an beih thu hriat a ni a.
He inbeihnaah hian Military council sipaiten ralthuam lian an tawngpawng kah chiam a, Khampat No.1 Ward-a RC Biak in kawta In pakhat a bomb fuh avangin pa pakhat a borala chenna in thenkhat a chhiat nual thu hriat a ni bawk.
“July 22, zan dar 8 atangin Khampat-a PDF tangrualten police station leh Military council sipai camp an bei a; mipui thi leh hliam an awm lovin kan hria a. Military council sipaiten PDF sipai 2 an man, chhuah tur kan phut a, in chhuah loh chuan kan bei ang che u tia kan lo sawi lawk tawh a ni” tiin tualchhung mi pakhat chuan Yangon Khit Thit Media hnenah a sawi a ni.
Tualchhung mi 2 an man tawh hnuah police station chhehvela mipuite inthliar fihlim turin PDF-ten an ngen thu an sawi bawk a ni.
He inbeihna avangin July 23 khan Jet Fighter-in vawi 2, sipai an dah belh thu hriat a nih hnuah chhun dar 12 vel khan an inkap leh chiam a, Military council sipaiten bomb vawi 2 an thlak thu hriat a ni bawk.
