Military council sipaite leh PDF-te inkah buaina avangin Sagaing region, Tamu District, Khamphat khuaa tualchhung mi 1000 chuang te chu Kalaymyo khaw lamah an raltlan thu tlawmngai pawl zinga mi pakhat chuan a sawi a.
He inkahna buaina avangin India lama tlanchhia an awm angin Kalaymyo-a Biak in leh chenna in hrang hranga an raltlan hlawm thu tlawmngai pawl zinga mi pakhat chuan heti hian a sawi a.
“Khawchhungah an in kap nasa hle a, In 500 chuang awmna inah tu mah an awm ngam tawh lova, Khampat atangin Kalaymyo-ah an tlanchhe nual a, mutbu pawh an la hman lo, fur lai a ni a, thosilen pawh an nei lova, ei in leh thil dang te pawh tanpui an tul khawp mai” tiin a sawi a ni.
July 23 atang khan Military council sipaite leh Khampat PDF te an inkap nasa hle a, July 25 tuk pawh khan Military council sipaiten an bomb leh a, khawchhunga la chambang thenkhat te chu ramhnuai leilet hmunah te an biruk hlawm thu hriat a ni bawk a.
Raltlan te hi khaw eng zat nge mihring eng zat nge tih hriat chian an la ni lova. He buaina chungchangah hian Military council sipaiten thuchhuah eng mah an la tichhuak lova, RFA Media-in Military council thupuangtu Gen. Zaw Min Tun, phone hmanga an zawhnaah chhanna a la awm rih lo a ni.
