Sagaing region, Tamu township, Khampat khua leh a chhehvela inkah buaina avanga raltlante an chenna inah an haw kir leh nual thu tualchhung mi te hnen atanga hriat a ni a.
Kalaymyo atanga Tamu panna kawnga awm Khampat khua chu July 22 khan Military council sipai te leh PDF te an inkah nasat avangin Khampat leh a chhehvela tualchhung mi te hmun him zawkah an tlanchhe nual a.
Tualchhung mipui te an tlanchhiat lai hian khawchhunga in leh dawr te an rawk nual a, buh phun hnu, tul zual lai an nih avangin August 2 khan PDF-ten a haw theih tawh e an tih avangin hmun hrang hranga raltlan te chu an chenna inah an haw kir leh hlawm thu raltlan haw kir zingah mi pakhat chuan heti hian a sawi a.
“Kan awm loh laiin Dawr leh in thenkhat an rawk nual a, inkah boruak a reh deuh nia kan hriat avang leh kan buh phun enkawl zui a ngaih tawh avangin PDF te kan hriattir a, kan vai chuan kan haw rih lo, mipa lam chauh an la haw rih” tiin a sawi a ni.
Raltlan haw zinga in rawk tuartu pakhat chuan “Kan haw hlim hian awmpui kan nei nual a, kan Phone dawr an rawk vek a, phone leh Laptop a awm tawh lo, thil dang chu kan en chiang hman lo” tiin a sawi a ni.
Khampat khawpuiah hian July 22 atang khan Military council sipaite leh PDF te ni 2 chhung an inkahna avangin Kalaymyo, Tamu leh India lamah an tlanchhe nual a.
Hetia an tlanchhiatsan lai hian Khampat No.1 Ward-a chenna in 15 an hal chhiat thu hriat a ni bawk.
