Military Council ten sorkarna an lak hnu hian ralthuam hmanga chenna in leh Biak in baka sakhuana Building an hal chhiat tawh zawng zawng hi 10000 bawr vel a ni tawh a. Heng an tihchhiat zawng zawng te hi tualchhung mi ten an hriat dan a ni a, heng thu hi Military Council ten thu dik a ni lo tiin Military Council thupuangtu chuan a hnial. Hriat dan ve ve kara he chhiatna chungchang hi Yangon atanga News thawn chu Ma Theingi Thaih (Mah Teng Ki Thaih) chuan heti hian a sawi.
Military Council te hian hmun 254-ah chenna in 9187 zet an tihchhiat tawh thu Data for Myanmar chuan an thuchhuahah an tar lang. He thil thleng pawh hi Military Council ten kum 2021, February ni 1 atanga kumin April 13 thlenga an chhinchhiah thu tar lan a ni bawk. Human Right pawl leh raltlan tanpuitu pawl ten an chhinchhiah zat ai hian tualchhunga Military Council ten an tihchhiat zat hi a tam zawk hle ang tiin an sawi zui bawk.
Military Council-te leh tualchhung veng himtu pawl PDF te nena inkahna tamna ber Sagaing Region-ah hian vawiin thleng hian a khawpuma raltlan an la awm mek a. Sagaing Region, Paletwa township chhungah Military Council ten then fai hna an thawh avangin khaw thenkhat phei chu a khawpumin an hal chhiat thu tualchhung mi pakhat chuan a sawi. Raltlanna hmuna buk inkhuar ve nawk nawk ten an chenna in lum an la luah ngam loh thu a sawi zui bawk.
“Tun hma angin kan haw ngam tawh lova, kan haw ngam zeuh a nih pawhin mi pahnih khatin kan tlawh zawk a, engmah lak tur a awm bawk si lo, a hlauhawm zawk a ni. Thenkhat chuan ngaih that nan tlem azawng an thuam tha a, a chung khuh leh bang siam chawpa luah te pawh an awm nual, Mipui pawi sawi lo hetia innghaisak chiam hi chu mihring tiha mawi lo tawpkhawk a ni” tiin a sawi.
Sagaing Region-ah hian Military Council-te leh PDF te hi ni tin deuhthaw an inkah tih theih a ni a, he inkah avang hian raltlan pawh an tam tial tial reng a. Military Council ten sorkarna an lak hnu hian chenna in tam tak bakah Biak in leh a kaihhnawih 100 chuang an hal chhe tawh.
Mipuite chhut danin Sagaing Region, Magwe (Ma Gui) Region, Kaya State-ah leh Chin State-ah Biak in leh Sakhaw Building 100 vel Military Council ten an hal chhe tawh a. UN leh Human Right thuchhuah Asia RCM chanchinbu UCA-in a lak chhawn dan chuan Chin State huam chhungah Biak in leh kohhran in dang 62 zet Military Council ten an hal chhiat tawh thu an tar lang. Chin State, Thantlang khawpuiah Military Council-te leh PDF te inkahna avangin Military Council ten chenna in a za tel bakah Biak in an hal chhe nual tawh thu a sawi zui bawk.
Hetia Chin State-a Military Council ten rawng taka an chet avang hian ram hrang hrang ten Action la turin leh mipui ten an in leh lo tundin leh nan tanpui an ngaih thu Chin Human Right (CHRO) Director Salai Za Uk chuan a sawi.
“Keini Chin State-ah Myanmar rampum huapah mihring 1% vel chauh kan awm a, chenna in an tihchiat erawh 17% a ni thung. Military Council ten an chetnaah hian kan tuar nasa hle a. in leh lo tlansan kan tam ta hle. Hetia Military Council ten min beihna avang hian chhiatna nasat tak kan tawk a, rin aiin raltlan pawh an tam reng a ni. Ram hrang hrang ten an hmuh chuan eng tiang khawpin nge , min lainat ang tih hi kan hmu tlang nghal a ni.
Mihring 478000 chuang chenna Chin State-ah hian 90% hi Kristiian an ni a. Mi 350000 chuang chenna Kaya State (Kayinni) RCM Kohhran member mi 90000 chuang an awm a. Military Council ten sorkarna an lak hnu, kum khat chuang vel thleng khan Chin State, Kaya State. Sagiang Region leh Magwe Region-a Biak in leh Sahaw in dang bakah School tiamin chenna in 8262 an hal chhiat thu UN-a mipui chhawmdawltu pawl (OCHA) ten an thuchhuahah an tar lang..Kayin mipui hmangaitu Human Right (KHRG thupuangtu Saw NanDar Soe chuan Myanmar ram chhungah hian a Sing tel chenna in an hal chhe tawh a, mihring zah lohna vang liau liau a ni tiin a sawi.
“Military Council ten sorkarna an lak atang hian ram chhunga mihring suatna chungchangaah ni tin a hluar zel a. Tlangmi awmna Chin State, Kayini leh Kayin awmna hmun dangah pawh Military Council-te an che zel a. Pakhatnaah chuan dan pelin an che a, Pahnihnaah chuan International dan an kalh a, Pathumnaah chuan mihriang zalenna an pal zut a ni”.
Mipui sawi danin Kaya (Kayinni)-ah hian chenna in hal chhiat tam ber dawttu an ni a. Kaya State-ah Military Council ten Thlawhna hmanga an beihnaah chenna in an hal chhe nual a. Loikaw (Luai Khaw) khaw chheh vel te Shan State lamah pawh an khawpumin an tlanchhia nual.
Kaya State, Nanmekhong (Nan Me Khong) township-a mi pakhat chu ralthuam lianin a fuh avangin a chenna inah a kang hlum a. bawihsawm tur pawhin kal ngam a nih loh thu a sawi zui bawk.
“Khawchhunga kan awm lai chuan Thlawhnain min Bomb thin a, kawng lun laia kan awm avangin kan hlauthawng hle a. Bomb puah avanga thi thawmte kan hria a, kan chian ngam bawk si lo. Chenna in pakhat din tur hian kum rei fe kan inkhawl thin a. Chu vang chuan an hal chhiat tak in pakhat din leh tur hian keini tan chuan sawi thiam har tak a ni”
Inkahna avanga chenna in leh Biak in, hal chhiat chungchangah tu tih zawk nge tih sawi neuh neuh a awm thin a. Military Council thupuangtu Major General chuan Military Council ten sorkarna an lak hma leh lak hnu hian hetianga uchuak taka kan chetna a awm ngai lo tiin a chhang.
“ Thil awm dan ka sawi duh. Entir nan, Sagaing Region-ah chuan PDF in dinte hi kan bei ang kan ti a. PDF te nen kan inkah hnu hian PDF ten chenna in an hal chhiat chu keimahni thiltihah puhin Social Media-ah in tar lang a. Keini lam chuan mipui harsatna siam emaw, in leh lo tlansantir emaw pawh ni se, Military Council te hian a tanpui tur a ni a. Ram tana harsatna siam hi kan ti ngai lo. Heng chhiatna thil thleng hi min puh zel a ni tih hi ka sawi duh a ni” a ti.
