KHAWVEL MIT FUKNA ASEAN SUMMIT

0
KHAWVEL MIT FUKNA ASEAN SUMMIT
Indonesia khawpui Jakarta-a neih tur “Special ASEAN Summit on Myanmar” ringawtin ka thinlung a luah khat. International Relations leh Myanmar buaina chungchang ngaihven zawng zawngte chuan he Summit thu chhuak hi an ngaichang thup ngei ang le.
ASEAN chu eng nge? A lam pum chu Association of South East Asian Nations tih a ni a, 24th February 1976 khan din niin South East Asia-a ram 10-te chu Member an ni. Member ramte chu – Thailand, Indonesia, Vietnam, Philipines, Laos, Cambodia, Myanmar, Brunei, Singapore leh Malaysia te an ni. Summit hi kum khatah vawi hnih an nei thin a. A chang chuan an member ni ve chiah lo, ASEAN Dialogue Partner an tih, China, Japan leh South Korea te hi an Summit-ah hian an swm ve thin.
ASEAN Motto chu “One Vision, One Identity, One Community” tih a ni a. An din chhan ber chu Economic, Political, Security, Military, Education leh Socio-Cultural-ah te thawhhona leh inpumkhatna tha tak neih a ni. Kum tin Member ramte hian Chairman nihna an inchelh chhawk thin a, kuminah hian Brunei-in Chairman nihna an chelh a.
Vawiin(24 April, 2021) Special Summit an koh chhan hi an member ram, Myanmar-in buaina namen lo a tawk a, chumi chin fel dan kawng chu ngaihtuahho an tum a ni. He Summit-ah hian Myanmar atangin Sipai Sorkar din “State Administrative Council (SAC)” an sawm a, chumi aiawh chuan Gen. Min Aung Hlaing a tel dawn tih confirm a ni tawh a, amaherawhchu amah ngei Jakarta-ah a kal ve dawn nge, Online-in a tel dawn tih hriat chian a la ni lo. Hetih rual hian mipui thlan MP ten an din Sorkar, “National Unity Government (NUG)” of Myanmar pawh an sawm tho a. Mahse, NUG lam hian Dan kalha thuneihna chang, an ram mipui pawisawi lo mi eng emaw zat thattu leh nghaisatu Gen. Min Aung Hlai-a te telna Summit-a tel ve an tum loh thu an lo sawi tawh a ni.
He Summit-ah hian UN Secretary General’s Special Envoy to Myanmar, Christine Schraner Burgener-i pawh a tel dawn nia sawi a ni a. Christine-i hi chuan nasa takin Myanmar Sipaite chet dan dik lo leh nunrawn dan te, Myanmar Sipaite thuneihna paih thlaa NUG zawk Sorkar anga recognise a tul thu te a sawi ngei tura rin a ni.
Myanmar buaina hi chu kan hre heuh tawh a, sawi belh vak tawh lo ila. A ram mipuite mangang chuan UN leh International Community-te inrawlh turin vawi duai lo an lo ngen tawh a. Mahse, China leh Russia te hi Myanmar Sipai lamtang an nih tlat avangin an Veto an hmang zel a, UN pawhin hma a la hlei thei lo a nih hi.
Chutih rualin khawvel ram tam zawk Myanmar mipui lamah an tang a, UN Secretary General pawhin a tul anga hma la turin ASEAN ramte hi a ngen ta ringawt mai a ni.
ASEAN Summit hian Myanmar buaina chungchang hi an han sawiho ang a. A tul a nih chuan Myanmar Sipai Sorkar paih thla turin Sipai an tir lut thei a, hetianga an ti a nih chuan nasa takin thisen a chhuak ngei dawn a, mipui Sorkar erawh an din ngei ang.
Myanmar ram buaina chin fel nan chuan Indona pumpelha SAC leh NUG te dawhkan kilho-a in-compromise mai tura an ngen a rinawm mah zawk.
Engpawhnise, i lo thlir zel phawt ang.
Credit :James Ramdinmawia
Share.

Leave A Reply

Exit mobile version