World Health Organization (WHO), director general, Dr Tedros Adhanom Ghebreyesus chuan khawvela Malaria (sikserh) venna (vaccine) hmasa ber, Mosquirix (RTS, S Vaccine) chu siam chhuah a nih thu leh a dark zau thei ang bera hmang turin October ni 6 khan a puang chhuak a.
He vaccine hi British pharmaceutical company GlaxoSmithKline (GSK) chuan kum 2019 atangin enchhinna a lo nei tan tawh a, chutah chuan Africa khawmual chhunga Ghana, Kenya leh Malawi rama naupang nuai 8 velah enchhin a ni a.
Malaria vaccine enchhinna (clinical trial) kalpui chhung pawh a rei ang reng hle a, kum 4 chhunga Africa rama enchhinnaah chuan he vaccine hian malaria zaa 39% a veng thei a, naupang zingah pawh malaria hlauhawm chi natna lak ata zaa 29% velin a veng thei bawk tih hriat a ni.
World Health Organization (WHO), director general, Dr Tedros chuan, ‘kum 30 vel zet nghakhlel taka kan thlir malaria natna venna dawmdawi siam chhuah theih a lo ni ta hi khawvel mipuite tan inenkawlna kawngah bung thar kan kai leh ta a ni,’ tiin a sawi.
Khawvelah hian malaria hrik pai thosi avangin kumin mipui nuai 4 vel an la thi ziah a, chung zinga a tam ber chu Africa khawmuala mite an ni. Khawvel ram changkang tam takah chuan malaria hi an do hneh titih tawh a, ram thenkhatah chuan do rem a ni hial tawh a. Mahse, malaria vaccine mamawh ram tam tak an la awm a ni.
