Sagaing region, Khin U township huam chhungah April 19 tuk khan Military council sipai ten operation an neih nawn leh avangin khaw 21-a tualchhung mi 20000 chuang in leh lo an tlansan thu tualchhung mi ten an sawi a.
April 19 zing dar 6:00 vel khan Ye U township-a awm Military council sipai ten Khin U township-a Min Daung khaw bulah operation an neih thu tualchhung mi pakhat chuan RFA Media a hrilh a.
“Hemi tuk hian Military council sipai ten min beih avangin kan tlanchhe chiam a. Min Daung khaw chhim lama Khaw 12-ah mipui 18000 chuang an tlanchhia a. He lama mi te nen mi 20000 chuang kan tlanchhia” tiin a sawi.
Heng Military council sipai operation te hi PDF ten Mya Kan khaw bulah an lambun a, PDF sipai mi 5 an boral thu tualchhung mi ten an sawi a.
Heng bakh Military council sipai ten tualchhung mipui mi 5 an man bawk a. Auang Ta khuaah zing dar 11:00 vel khan chenna in an hal nual a, an hal zat chiah hriat chian a nih loh thu tualchhung mi ten an sawi bawk.
He inkahna chungchangah Sagaing region, Military council sipai thupuangtu U Aye Hlaing, RFA Media ten phone-a an zawhnaah chhanna a la awm rih lo a ni.
Military council sipai ten April 18 khan Ye U township atangin Khin U township, tlak lam leh chhim lam inkarah an luhchilh avangin tualchhung mi 8000 chuang an tlanchhiat chu hriat a ni.
