September 21, zing lamah khan Sagaing Region, Khin U township-ah Military Council sipai ten operation an beih nasat avangin Khaw 10 chuanga tualchhung mi, 10000 chuang an tlanchhiat thu tualchhung mi te hnen atanga hriat a ni.
“Tukin dar 1:00 vel khan Military Council sipai ten Thabeikkyin (Ta Peih Chin) township atangin Motor board 5, Ma Le khaw lamah Motor board 2, an innghat bawk a. Zing dar 5:30 velah Motor board 3-in Wa Gyi Lawng chawlhna hmunah an chawl leh a. Zing dar 6:30-ah Thin Paung Kar, Lawng chawlhna hmunah an chawl leh a. He mi avangin Khin U khawpui atanga ni tlakna lam zar, Khaw 6-a tualchhung mi 7500 vel an inthliar fihlim a. Khin U khawpui ni tlakna lam, Ye U (Zi U) khua atangin an lut bawk. Ywa Thit (Zua Tit) khua luh chilhin an rawk chiam a, tualchhung mi 3 vel an man” tiin tualchhung mi pakhat chuan Yangon Khit Thit Media Group a hrilh.
Heng Military Council sipai hi Thabeikkyin (Ta Peih Chin) No.13 Military zirna School atanga zir chhuak Battalion-te chuan Motor board-in Irrawaddy tuipui an kan a, tukin hma lam khan Khin U township-ah operation an nei ta a ni.
“A Nyar Tiha Taw (A Ngia Ti Hah Taw), Swe Min Gan, Thin Paung, Ka Byaut, Kok Thet, Yung Pin khuate chu a khawpumin tukin khawvar hma atang khan an tlanchhe hlawm a. Nausen leh kum upa lam ten, harsatna an tawk ngei ang” tiin tualchhung mi pakhat chuan a sawi.
Military Council sipai ten Ye U khua leh Khin U khawpui, inkar kawngpuiah Operation an bei mek a. Ywa Thit khua, luh chilhin an rawk nasa hle a, tualchhung mi an man nual bawk. Khin U township atanga ni chhuahna lam zar Ywe Thit khua, Moe Thar Thet Pyi (Mu Ta Tet Pi) khuaa tualchhung mi 3500 vel an tlanchhiat thu hriat a ni.
