Sagaing region, Khin U township, KyiIaing khuaah June 2 tuk khan Military council sipaiten an luh chilh a, chenna in an hal bakah ralthuam lian an kah avangin tualchhung mi 3 an hliam thu tualchhung miten an sawi a.
Military council sipai 100 rualten KyiIaing khua an chhuahsan tawh hnuah MaYanIn khuaah buk an khuar leh thu tualchhung mi pakhat chuan heti hian a sawi a.
“Khawvar rualin KyiIaing khua an hal a, mei khu zam ral khat atangin kan hmu thei a, ralthuam lian an hman avangin mipa 3 an hliam a, thil kimchang kan la hre thei rih lo; tunah hian MaYanIn khuaah buk an khuar mek a, an riak mai thei” tiin a sawi a.
Military council sipaiten May 1 atang khan Khin U township-ah ni 2 chhung an beihnaah khaw 12-a tualchhung mi 7000 chuang in leh lo an tlansan thu hriat a ni a.
He beihna chungchangah hian Sagaing region thupuangtu region Inmmigration U Aye Hlaing phone-a an zawhnaah chhanna an la awm lova.
Military council thupuangtu General Zaw Min Tun-a, RFA Media-ten June 6-a phone hmanga an zawhnaah chenna in reng reng kan sipaiten an hal ngai lo tiin a lo chhang tawh a ni.
Military council sipaiten thuneihna an lak, kum 2 chhungah hian Khin U township-a khaw 74-ah chenna in 5000 chuang an hal chhiat tawh thu tualchhung mipuiten an sawi a.
Military council sipaiten chenna in an hal chhiat avangin in leh lo, nei lo mi 3000 chuang te chhawmdawl an ngaih thu an sawi a.
UN OCHA-ten an chhinchhiah dan chuan Military council sipaiten thuneihna an lak hnu hian chenna in leh Building 60000 chuang an hal chhe tawh a, tualchhung mi maktaduai 1.5 velin in leh lo an tlansan tawh thu an tar lang a ni.
