KNU brigade 5 Commander Pakhat Kawmna (Khaikhawmna)

0

“Kan awm chhung chu PDF te military council-in engtin mah a ti lovang, PDF te indo thei tura an inpeih hunah kan thawk ho ang,”

Karen National Union (KNU) brigade 5 control area frontline-a commander pakhat kawmna hi han khaikhawm ta ila:

Ral hmatawng (frontline)-a awm kan nih angin, military council sipaite operation nen kan insu buai reng a, inhmachhawna inkah theihna chance pawh a tam hle a, anni chuan an tana tan hmun tha tak သီးမူထ camp chu lak let leh an duh a, min dil hial a. Kan pek duh tak loh avangin, BGF te nen pawh kan inhmachhawn phah a. Tun hnai hian inkahna a chhuak nasa hle bawk a ni.

BGF te nen pawh hian inbiak rem theih dan kan ngaihtuah mek a, heng BGF te pawh hi sipai kut hnuaiah awm mah se, Karen mite vek an ni a, an thuneitute nen kan inbe mek a ni. Anni zingah pawh min rawn thlawp duhtu an awm a, tun hma deuh pawhin min thlawp an tum a, tunah pawh min la rawn thlawp mai ka ring.

Military council-in operation a neih dan chungchangah chuan laipui a hmang nasa a, drone hmangin a enthla kual a, khawmual lama inkahna chu yard 400 vel inkarah a ni tlang pui a. September ni 1-a kan inkahna phai chu kan inhnaih chilh hle a ni. Mahse, a tu zawk pawl mahin nunna kan chan lo a. A buaithlakna ber chu Drone hmanga an rawn enthlak hnuah jet-fighter hmangin min rawn bei zui thin hi a ni a, mipui tan lo inthiarfihlim ngei ngei a ngai a ni.

Sipaite hian tum khataa operation an neih hian force 400 vel an inzui tlang pui a, chung chu kan hre lawk sa thlap thei a. Inkahna hmuna awm kan nauten chanchin min rawn hrilh zel thin a, mahse tun hnaiah internet a that loh chuan indona hmuna awmten thlalak min rawn thawn thei thin lo a.

Indona emaw inkahna takah hi chuan PDF naupangte chu an la tel lo, zir tur leh mamawh an la nei nual a, training an la zo lo hlawm bawk a, chuvangin, frontline (ral hmatawnga) kaltir chu kan la nei lo.

Heng PDF thalai te chungchanga brigade 5 ngaihdan chu hmun khata cheng ho, tui tlan inang, in kan nih angin, keini kan awm chhung chu military council ten PDF te hi engtin mah a ti thei lovang. Kan theih ang tawkin kan veng bawk dawn a. Military council lam chuan PDF hi an kuta hlan turin min rawn dil thin mah se, tun thlengin kan la hum zel a ni.

Anni ngaihdanah pawh rahbehna hnuaia awm an nih angin, zalenna an duh a, pawisawi lo kawngzawhte sipaiten silai hmanga an hmachhawn takah chuan anni pawhin ralthuam ken an thlang ta niin ka hmu. Tun dinhmunah chuan mamawh tam tak an la nei a, chuvangin, ral hmatawngah chuan kan la tir lo.

PDF thalai thenkaht zingah in lama haw duh te pawh an awm a, thenkaht chu lehkha thiam Doctor, engineer degree nei te an ni a, ramhnuai awm chu an tan a harsa hle a, mahse an kir leh a nih chuan an him dawn si lova, chuvangin, hrehawm ti takin an awm hram hram a. Chutih rualin in lama haw duh, in report tumah an la awm lo, sipaiho do ho tur vekin an inpuahchah a ni.

NUG sorkar-in D-Day a sawi, a lo thleng a nih chuan keiniin hmahruaiin bei ta ila, a tha ang. NUG-in hma a hruai a nih chuan hmabak a la awm nual ang. Engpawhnise, indo tura kan inpeih tawh a nih pawhin PDF thalaite hi ral hmatawnga kaltir chu kan tum chuang lo. Kan hnungah kan mamawh anga awm turin thutlukna kan siam a. Anni ho hi frontline-a kal turin kan hruaitute leh commander-te pawhin ngaihtuaha thutlukna siam a la awm lo. Chu chu tun dinhmun a ni a, nakinah fighting skill an nei kim tawh a nih chuan kan rualin an rawn che chhuak ve ang.

Share.

Leave A Reply

Exit mobile version