KNU huam chhungah January 2023 thla chhung khan Military council sipai 337 an thi a, KNU Bridge 5 huam chhungah pawh February 15 khan Military council sipai 28 an thih thu KNLA Bridge 5-a Mutraw news thuchhuah atanga hriat a ni.
Kumin 2023 January thla chhung khan Kayin State huam chhungah Military council sipai te leh KNU/KNLA tangkawp te vawi 333 an inkap a, Military council sipai 337 an thi a, mi 280 an hliam a ni. He inbeihnaah hian KNU/KNLA tangrual te zingah mi 24 ten ram tan an nunna an hlan a, mi 75 an hliam bawk. Heng thi leh hliam zingah hian PDF te an tel nual thu KNLA Office thuchhuah atanga hriat a ni.
Hetiang vek hian Kayin State Kawtulay (Kaw Tu Li) huam chhung KNU/KNLA Bridge 5 huam chhungah February 1-15 thleng khan vawi 91 an inkap a, Military council sipai 28 an thi a, mi 11 an hliam a, KNLA sipai pakhat a boral thung a ni. Military council sipai ten Luta township, Saw Mu Palaw village tract, Tawbawkaw khuaa pawi sawi lo Saw Maung Nu an thah thu KNU Bridge 5 hnen atanga hriat a ni.
Military council sipai ten chung lam Thlawhna hmangin chenna in, school, leh leilet hmunah vawi 40 chuang an bomb a. Khawmual lam atang pawhin ralthuam lian vawi 18 zet an kah chhuah avangin chenna in, school, chawlh buk telin 26 a kan chhiat thu hriat a ni bawk.
Heng bakah hian Chek in 3, dawr 3, Bike 1, car 1, Tractor 4, Buhdengkhawl 1, internet wifi 1, engine generator 1, furniture leh bungrua tam tak an chhiat chu hriat a ni.
