University of East Yangon, hruaitu Ko Kaung Kant Naing, Ko Aye Min Thaih, Ko Phyu Kaung Thaih, Ko Hein Thet Zaw leh Ko ThiHa Naing te chu ram tibuaitua puhin section 50(i) leh section 54 hmangin Military council-ten kum 10 theuh Jail bang zut leh turin hrem an nih leh thu an chhung hnaivaiten RFA Media an hrilh a.
Heng zirlai mi 5 te hi July 10 khan an hrem nawn thu hriat a ni a, Ko Kaung Kant Naing, Ko, Ko Phyu Kaung Thaih, Ko Hein Thet Zaw leh Ko ThiHa Naing ram tibuaituah leh Protection of public property case-in kum 2022 December 26 khan kum 16 theuh Jail tang turin an hrem tawh a.
Aye Min Thaih erawh kum 5 Jail tang turin an hrem thung a, an vai hian University of East Yangon Court-in an hrem thu zirlai hruaitu pakhat chuan heti hian a sawi a.
“Kum 2022 April thla Military council-ten an man, Aye Min Thaih tel lo an thian mi 4 te chu kum 10 theuh an belh leh avangin kum 26 theuh Jail bang an zut dawn ta a, Aye Min Thaih erawh chu kum 5 belh lehin kum 15 Jail a tang thung dawn a. Heng zawng zawng hi University of East Yangon Court-in thutlukna a siam a ni” tiin a sawi a ni.
Zirlai tleirawl mi 5 te hi InnSein Jail-ah an khung mek a, an hriselna an la that zel thu University of East Yangon-a zirlai hruaitu pakhat chuan a sawi a, University of East Yangon atangin zirlai mi 16 an man tawh thu a sawi zui bawk a ni.
Political prison (AAPP)-ten kumin 2023 July 21-a an thuchhuahah chuan Military council-ten thuneihna an lak hnu hian ram chhungah tualchhung mi 23980 an man tawh thu an tar lang a ni.
