Kumin 2023 chhungin Bangladesh, Cox's Bazaar hmuna Rohingya camp-a Rohingya mi 16 pawi sawi lo an that tawh a, kan hma lam hun tur hi a ngaihtuahawm khawp mai tiin Rohingya raltlan ten an sawi a ni.
Kumin March 25 theng thla 3 chhung khan Bangladesh raltlan camp-ah Rohingya mi 14 an thah tawh thu RFA Media chuan March 28 khan a tarlang tawh a.
Hemi hnu April 1,2-ah khan mi pakhat an thah belh leh thu Rohingya raltlan zinga hming thup pakhat chuan hetia hian a sawi.
“April 2 khawvar rual khan mi pakhat an that a. April 1 pawh khan ralthuam keng pawl te an inkahnaah camp No.8-a raltlan duty pakhat an kah hliam a, a boral zui nghal”
Heng bakah hian Balukhali Refugee camp-a Rakhine Rohingya Justice and Human Rights Organization zinga U Saw Lun pawh March 30 chawhnu khan an man a, tun thlengin a biak pawh theih rih loh thu a chhungkhat hnaivai mi pakhat hnen atanga hriat a ni.
“A inkhawm bang haw lamah ralthuam keng pawl ten an man a, a chanchin tun thlengin kan la hre thei rih lo”
U Saw Lun hi a chhung ten raltlan buaipuitu pawl lian UNHCR leh Bangladesh police te hnenah an report a, Bangladesh sorkar ten an zawng mek a, eng thu mah hriat chian a nih rih loh thu a sawi a ni.
Cox's Bazaar hmuna Rohingya camp-ah hian camp 34 a awm a, camp No.1,2,8,9,13,17,19-a awm raltlan te an thah thu a sawi zui bawk.
Heng an thah tak te hi Rakhine Rohingya pawl ARSA-a tlan chhuak te, ARSA eptu te leh an thian hnaivai te, camp leader te leh In za lalte an nih thu raltlan ten an sawi a ni.
Heng an thah te hi mipa vek an ni a, Janaury thla khan mi 2, February thlaah mi 2 leh March thlaah mi 10 leh April thlaah mi 2, an vaiin mi 16 an thah thu a sawi zui bawk a ni.
Bangladesh sorkar ten, dan lova mihring insawisakna leh thahna chungchangah hremna nasa tak lain khawvel hriatah puang zar se, raltlan te nunna humhalh thu-ah hma la thuai se tih hi Rohingya ten an beisei hle a ni.
