Sagiang region, Sagaing township, KwelPone khuaah Phyusawhti pawl ten Tui theh Kut hmanna tur Pandal an sak zawh hnu tui theh hmanga an infiam lai, Drone hmangin an bomb a, Phyusawhti leh an chhung te telin mi 8 an thi a, mi 30 chuang an hliam thu tualchhung mi ten Yangon Khit Thit Media a hrilh a ni.
April 13, chawhnu dar 5:00 vel khan KwelPone khuaa Phyusawhti pawl te leh an chhung ten Basic Education High School kawtah Mandat saa tui theha an intihhlim laiin Drone hmanga an bomb-naah mi 8 an thi a, mi 31an hliam a. Heng hliam te hi Sagiang Civil hospital-ah phur lutin an enkawl thu hriat a ni.
“KwelPone phyusawhti te hian School-ah leh chhim lam Field-ah zu rui chunga tui an intheh chiam lai; an awmkhawmna hmunah Drone-in an bomb a, mi 7 an thi a, mi 30 chuang an hliam nia hriat a ni a. Heng hliam te hi damdawi ina an kalpuina turah beih nawn leh an hlauh thu Phyusawhti ten an sawi” tiin tualchhung mi ten Yangon Khit Thit Media a hrilh a ni.
Bomb hmanga an beihnaah hian Military council sipai ten Phyusawhti 8 an thi a, mi 31 an hliam thu an thuchhuahah an tarlang a, PDF eng pawlin nge an beih tih erawh an tarlang lo a ni.
Hetia Phyusawhti chhungkhua te an beihna avangin KwelPone khuaa Phyusawhti ten zanah a khaw chhehvel ralthuam lianin an kap chiam a, a khaw chhehvel tualchhung mipui te an tlanchhiat nual thu Sagaing township-a news atanga hriat a ni bawk.
