[4:29 pm, 10/09/2021] J. Sangtea: Chin state, Thantlang township chhung, Lungler khuaah CNF kaihhruai CDF leh military council sipaite chu tukin zing, September ni 10, zing lam dar 5:30 vel atang khan an inkap tan tih hriat a ni a.
CDF lamah mi 5 an hliam thu leh khaw laia bomb a puah avangin, in thenkhat a chhiat bakah Methodist Church (biak in) a chhiat deuh vek thu dawn a nih bakah civil mi pakhat pawhin hliam a tuar bawk tih hriat a ni. Military council sipai lamah 6 kah hlum niin, 5 chu a nungchanga man an nih rualin Sipaite camp pawh lak fel vek a ni. Chuvangin, vawiin chawhnu lam atangin Military council sipai lamin jet-fighter ruaiin chung lam nen tang kawpin an bei nasa hle tih hriat a ni.
He inkahnaah hian mipui venghimtu sipai 300 vel an tel a, chung zinga 150 chu CNA/CNF ral rel thiamte niin, a bak chu CDF te an nih thu hriat a ni a. Sipai lam chu police nen tangkawpin 30 vel bawr niin, thi leh hliam dinhmun erawh hriat theih a la ni lo a. Chutih rualin Thantlang township chhung, khaw thenkhat atanga raltlan erawh an awm nual tawh tih hriat a ni.
Tualchhung mi pakhat chuan, “Tun dinhmunah Thantlang township atanga raltlan zat chu mi 100 vel niin, Farkawn (Miozram) lamah an tlan lut tawh a. Mi 15 vel chu ramri Tiau lui kamah an la tangkhang mek a, Quarantine center a awm tawh loh avangin an buai hle a. Thekte khuaah raltlan 50 leh Khankawn khuaah raltlan 50 chu quarantine-a dah luh nghal an ni a. Thekpui khuain tuna Tiau kama tangkang mekte chu an mikhual dawn niin kan hria,” tiin Tahan Post a hrilh a.
Inkahna chhuak avangin, Indo-Myanmar ramri depa awm khaw hrang hrangin harsatna tawk mekin, raltlante chu Farkawn (Mizoram) khaw chhehvelin an dawl zo tha mang tawh lova. Khaw thenkhat lahin an lo uksak vak bawk si lo a, an mangang hle tih hriat a ni.
Tun hnaia Mizoram chhunga raltlante chu Thekte khua (in 130 awmna)-ah raltlan 200, Farkawn (in 700 awmna)-ah raltlan 800, Khankawn (in 120 awmna)-ah raltlan 60, Khuangthing (in 350 awmna)-ah raltlan 15, Khawbung (in 400 awmna)-ah raltlan 200 leh Zawlsei (in 60 awmna)-ah raltlan 100 an awm thu hriat a ni.
