March 28 tuk khan Magwe region, Sa Lin township, Kin Pung Chong khuaa PDF tangrual pawl camp, Military council sipai ten an beih hnuah a khawpuma In an hal chhiat thu hriat a ni.
Military council sipai 200 rual ten March 25 khan Sa Lin township leh Si Toh Ta Yar township kiang Nga Hlain Twin khuaah an thleng a. Mel 2 vela hla Kin Pung Chong khuaa operation an neih laiin an kah thu Sa Lin township PDF thuneitu chuan Myanmar Now a hrilh a ni.
Zing dar 7:00 atangin darkar 3 chhung an inkap a, ralthuam indaih lohna avangin Sa Lin, Saw, Puit Phiu, Min Bu leh Si Toh Tah Yar khuaa PDF te an kir tawh hnu, zing dar 11:00-ah chenna in 130 vel an hal chhiat thu leh tualchhung mi 10000 chuang an tlanchhiat thu a sawi zui bawk a ni.
“In an hal darkar khat hnuah PDF leh tangrual ten then fai hna kan tawhnaah In 15 vel chauh a bang tawh. Tualchhung mi hliam an awm lova, kum upa leh naupang te tan damdawi an mamawh hle a, ei in chungchangah tangrual pawl ten an chhawm dawl mek a ni” tiin a sawi.
Military council sipai ten chenna in an hal chungchangah thuchhuah eng mah an siam lova. Military council sipai ten hetia an chetna hi a rei tawh hle a ni.
Military council sipai ten an halna hmun Sa Lin township-a tangrual pawl te hian an la hmachhawn zel dawn a, boruak a tang chho mai thei tiin PDF te hnen atanga hriat a ni.
Military council ten thuneihna an lak hnua chenna in an hal zat Data For Myanmar ten an chhinchhiah dan chuan kumin 2023 February 28 thleng khan In 60459 an hal chhiat tawh thu an tarlang a ni.
Sagaing region hi a tam ber a, a dawtah Magwe region niin In 9019 an hal chhe tawh bawk a ni.
