Kalaymyo khua atanga Monywa (Mung Zua) khawpui panna Maha Myaing motor kawnga inkahna avangin chawlhkar khat chuang kawng an khar a. Kalaymyo khawpui atangin Halkha khaw lamah kal kualin Mandalay khawpui lamah an kal thin thu hriat a ni.
Sagaing region, Tant Se township leh Maha Myaing lamah January 17 atangin PDF te leh Military council sipai te an inkap a.
Heng avang hian tun hmaa an kalna thin Kalaymyo–Monywa-Mandalay panna motor kawng a kal theih tawh loh avangin January 23 atang khan Kalaymyo khuaa motor gate thenkhat te Kalaymyo-Falam-Halkha-Gangaw-Mandalay motor kawngah an service zawk thu hriat a ni.
Car service thin pakhat chuan “Mihring kan phur lo. Hriatpuina lehkha a tul bawk si a. Bungraw thenkhat pawh phurh an phal lo. Tun hma bungraw phurh man Kyats 3000 ni thin kha Kyats 5000 niin 5000 ni thin kha 7000-8000 an phut” tiin a sawi zui bawk.
Chawlhkar khat chuang motor kawng an khar avangin Kalaymyo khawpui leh Tamu khawpuiah Kuhva hnah (Pan hnah) leh eichawp nepnawi a chatlak a, a awmchhun an inchuh nual thu hriat a ni.
Sagaing region-ah Military council sipai te dodalna avangin hmun hrang hrangah inkahna a chhuak nual a. Monywa-Kalay Yagyi (Ya Chi) motor kawng, Monywa-Kalaymyo-Gangaw inkal pawhna motor kawng kal tlang a theih loh thu Driver te leh tualchhung mi ten an sawi.
Chuvang chuan an rinrawl ber Maha Myaing motor kawng an khar tak avangin khualzin mi ten harsatna an tawh thu hriat a ni bawk.
