Mandalay kawng no. 74, thler no. 8 leh 9 inkar U-pouhdaw building-a awm thuziak thin, hmeichhiaa inlet LGBT Ma Saw Han Neui Oo chu September ni 6 khan a chenna inah firfiak siapiten luh chilhin an man a, Mandalay kulh chhunga indawpna (interrogation) hmunah a hmai chu chem tea zai, tui so-a leih, a ke silai fawnga sawh leh wire (hrui) hmanga vuakte tawkin, a rapthlak thei ang bera nghaisak a nih Ma Saw Han Neui Oo chuan Khit Thit media a hrilh a ni.
Ani chuan, “Jail-a rapthlak zawk chu Kulh chhunga indawpna hmun a ni a. Min man ni September ni 6 atangin ni hnih chhung chu min nghaisa a. Chemin min zai a, Tui sain min leih a, ka ke nise silai fawngin min sawh vak a, wire hrui pathum li vel hrualin min vaw bawk a, min dawp a. Chu mai duh tawk lovin, operation i nei fel vek tawh em tiin ka privacy laite min ensak a. Chutih rualin vawi tam tak ka bianga min ben bakah an kein min tlawh sawk sawk bawk a. Ka hmai chu an tuam tlat a, ka taksa pawh che thei lo turin tape hmangin min char bet bawk a, min sawisa a ni,” tiin a sawi.
Ma Saw Han Neui Oo chu firfiak sipaiten KIA-ah sipai training a nei tiin an man a, Obo (Central Jail)-ah pawh mipa thawmhnaw hak luihtirin, uihzat takin an awmtir bawk a ni.
Ani chuan, “Politics case-a thubuai kan hmachhawn laiin, indawpna, police station leh jail chhungah keini LGBT (Transgender) hmeichhia-a inlet tawhte chu jail chhungah harsatna chi hrang hrang paltlang a ngai a. Mandalay အိုးဘို jail kan thlen chuan hmeichhe awmna bik ward-ah min dah lovin, mipa thawmhnaw minhak luihtir a, mipa zingah min awmtir a. Chubakah tuai tiin min nuihzat khum bawk a ni,” tiin a sawi belh bawk a ni.
Mandalay khua, Ma Saw Han Neui Oo court-ah politics thubuai section 505 (a) hmanga thubuai a neih hnuah September ni 20-ah Mandalay Obo jail-ah dah luh a ni a, October ni 19 tlai lam khan chhuah zalen niin, tunah chuan hmun him lamah an tlan chhe nghalin, a thleng fel tawh tih hriat a ni.
