All India Radio News Aizawl-in a tar lan dangin India, Manipur-a tharum thawhna nasa tak a thlen avangin May 21 tlai dar 6 thleng khan Manipur aţangin sa himna zawngin raltlan sang sarih chuangin Mizoram an rawn lut tawh thu hriat a ni a.
Raltlan zawng zawng hi 7,348 an tling tawh a. Kolasib district-ah an tam ber a, mi 2,618 an awm a. Aizawl district-ah mi 2,305 leh Saitual district-ah mi 2,157 an awm bawk a. Raltlan lo luh belh an awm rualin an khua a ralmuan deuh tawh avanga Manipur-a kir leh an awm ve reng bawk niin Home department hotute chuan an sawi a.
India, Mizoram, Chief Minister Pu Zoramthanga chuan Beraw tlanga Art & Culture hmunah tun hnai Manipur buaina avanga raltlan te a tlawh a.
Pu Zoramthanga chuan an mamawhte sorkar hnenah thlen hreh lo tura chahin tanpuina tangka fai a pe bawk a. Art and Culture building-a awm mek te hi an vaiin mi 33, naupang 30 leh enkawltu 3 te an ni a. Manipur-a nu leh pa enkawltu nei tawh lo chawmna hmun atanga lo kal an nih thu hriat an ni a.
He Children’s Home a awmte hi a ţhen chu nu leh pa nei lo te, nu emaw, pa emaw chauh neite leh ţhenkhat chu naupang enkawl ngai hrim hrimte an nih thu hriat a ni bawk.
